Abakubandla leZanu PF bathi kukhangelelwe ukuthi izithunywa zika Mongameli Cyril Ramaphosa zizakhulumisana leziphathamandla zikahulumende kwele Zimbabwe, abaphikisayo labanye, kulungiswe okunye okuhluphayo elizweni.
Kodwa abanye bathi uNkosazana Baleke Mbete loDokotela Sydney Mufamadi bachitha isikhathi.
UMnu. Joseph Tshuma webandla leZanu PF uthi abantu kumele badonse ndawonye.
Uthi inkinga yikuthi abantu baqamba amanga ngokwenzakala eZimbabwe.
Kodwa uMnu. Mthulisi Hanana, umqondisi wenhlanganiso yeDumiso Dabengwa Foundation, uyakuphikisa lokhu esithi ucatshile okwamanje ngenxa kahulumende omdinga phansi laphezulu.
UNkosazana Vivian Nomalanga Bhebhe, olandela ezombangwazwe ekwele Israel, uthi kumele ibandal lika Mnu. Julius Malema kube yilo elingenela kwele Zimbabwe hatshi uhulumende weAfrican National Congress.
Lokhu kusekelwa nguMnu. Justin Jay Moyo, olandela ezombangazwe ekwele Canada.
Bakhona abathi kumele abantu abahlala eMatabeleland balwele uzibuse wabo hatshi ukumelela okungengiwa lilizwe leSouth Africa eZimbabwe.
UMnu. Nkululeko Mathe, owebandla leMthwakazi Republic Party, usekela umbono lo.
Akwaziwa ukuthi uNkosazana Mbete loDokotela Mufamadi bazafika nini kwele Zimbabwe. Uhulumende weZimbabwe kuthiwa wephula amalungelo kazulu. UMongameli Emmerson Mnangagwa labanye bakhe bayakuphikisa lokhu besithi balwisana lezikliwi ezifuna ukuhluthuna umbuso.
Your browser doesn’t support HTML5
'Ibandla Lika Malema Kumela Kube Yilo Elingenela Kokwenzakala eZimbabwe'