Inhlanganiso elwela amalungelo kazulu njalo izimele yodwa ibuthanise abamabandla ezombusazwe akhokhelwa ngabesifazane lalawo abikwa emele umkhono owodwa welizwe ukuthi babe lengxoxo ngalokhu abakumeleyo lokuhlaziya ukuthi ilizwe lingabe selilungele na ukuba lomongameli wesifazane.
Umqondisi weHabakkuk Trust, uMnu. Dumisani Nkomo, uthi ngemva kwengxoxompikiswano le benelisile ukuthola impumela abebeyikhangelele njalo abamabandla abaze lapha bathole ithuba lokuzethula emphakathini.
“Kade kulamabandla ombusazo otshiyeneyo njalo bahlangane loBulawayo.”
Umkhokheli webandla lePeople's Rainbow Coalition, uNkosikazi Lucia Mativenga, uthi uthole ithuba lokuzwa ukuthi bathini abanye abamabandla abikwa emele uhlangothi oluthile lwelizwe.
“Lami ngithole ithuba lokuzwa ukuthi amanye amabandla aphetheni.”
UNkosikazi Priscilla Misihayirambwi-Mushonga uthi umhlangano lo uveze ukuthi umuntu ongumama uncindezelekile.
“Kumele sikubone ukuthi ukuncindezelwa yikuncindezelwa abancindezeli bayafanana.”
Bekhuluma ngisIkhathi sengxoxompikiswano le, abesifazana laba bathi ilizwe akukhathalekile ukuthi likhokhelwa ngumuntu oyini, okuqakathekileyo yikuthi likhokhelwe ngumuntu olobuntu njalo lalivele lingakhokhelwa ngowesifazane lalapho lithola uzibuse.
Ephendula umbuzo ovele ebantwini umkhokheli weMRP, uMnu. Mqondisi Moyo, laye obekulumhlangano uthi amabandla lawa awalethi ngxabano ngemihlobo kodwa alwisa ukuthi kube lokunanzelelwa kwabantu bonke ikakhulu laba abavele bencindezelwe nguhulumende wakhathesi lendlela abahlele ngayo ilizwe.
UMnu. Nketa Mangoye, obemele iAlliance for National Salvation, uthi yena abantu basuke behlanganise imibono yokulwisa inkululeko yezigaba lokuxasana kwabantu ngemihlobo okungayisikho okutshiwo ngamabandla ngoba imihlobo yonke itholakala ezigabeni zemaNdebeleni.
Amabandla onke lawa avumelane ukuthi umhlukuluzi sewaze wanikeza abantu bemkhonweni wemaNdebeleni ulimi lenkulumo yokuzeyisa lokukhangelela phansi ubuntu babo.