Sokulobudlwangu obesabekayo obuqhamuke eShangani Mine esiqintini seInsiza bubangelwa ngotsheketsha okwenza abahlali balindawo bahlalele evalweni.
Kubikwa abesifazana bayahlukuluzwa okwamagama njalo kunyanga ephelileyo kudlwengulwe abayisithupha, 6. Akupheli viki bengagamulananga kubangwa igolide abalemba okungaphandle komthetho kulumgodi owama ukusebenza ngomnyaka ka2008.
Badla isitshwala lenyama 'otsheketsha' eShangani Mine. (Photo: Ezra Tshisa Sibanda)
Abemba igolide ngaphandle komthetho sebethwalise abahlali balindawo amagabh’avuzayo behlukuluza abesifazana njalo begeca ngamabhemba lamahloka yiloba ngubani abacabangela ukuthi ulegolide belithathe ngodli.
Ukuswelakala komsebenzi kwenza inengi kulindawo liziphilise ngokwemba igolide okungekho emthethweni. UMnu Brigjton Khumalo, omunye walaba otsheketsha, uthi kuyethusa kakhulu okwenzakala kulindawo.
"Egangeni lapha engigebha khona ngiphila ngokugebha bhudi. Ungaze uyithole loba kuyidollar uyakwanisa ukukuthathelwa, bakhona abathiwa ngo guju ayi bayathatha. Ah! Awusekho ungaphikisa! Ungathengisa lawe uthole okuyigramm uyabe utshayile. Sesithwele nzima sesifuna ukuthi ngabe ihulumende layo iyangenela isincedise."
UMnu. William Ngondo usile ekufeni ngemva kokuthathelwa ngenkani akwembileyo ngabanye otsheketsha.
"Issue yonaleyi ikhona but then seems ipolicy ayikukwanisi ukusolve issue yonaleyi, kakhulu okokuthi kuyafa abantu but then the issue is abantu bakhona vele even singabatshela vele akula action eyenzakalayo. Mina ngingathola umkute wami abalepower bayangithathela ngingafuna ukuyala lawo vele bayangibulala. The only solution is to give them. Bayathatha because akulaplani. Uyahamba ngaphi? Vele ungafuna ukuhamba khonangale end of the day uyabulawa because bayaromparompa khonalapha vele bayazakala ukuthi bakhona."
Isakhamizi seShangani, uMnu Rendazi Tshuma, ukhala ngamapholisa asehlulekile ukumisa ubudlwangilu kulindawo.
Bathenga ukudla 'otsheketsha' eShangani Mine lapho okulobudlwangudlwangu lokudlwengulwa kwabesifazana okumangalisayo. (Photo: Ezra Tshisa Sibanda)
"Lapho okutholakala khona igolide kuzwakala kuba lomsindo. Umuzi wakho ungaba khonapho lensimu yakho bayagebha. Amapholisa seyehlulekile? Hayi ngingathi ayehlulekile ngokuthi ayabuya abekhona kuyabe kuqhubeka kunjalo. Angadobha igolide bangabona ukuthi ulidobhile bayafika bamtshaye bathathe behambe yikho ukulimala okwenziwa abantu. Kutshukuthi kimi nxa bengafika ensimini yami bagebhe akulalutho engingalwenza yikuhlala ukhangele baze bahambe. Ngokuthi ungaze ubize amapholisa akutshintshi lutho."
Abantu abalitshumi lambili, 12, balinyaziwe kakhulu begecwa ngotsheketsha kunyanga edlulileyo. UMnu Navias Dlodlo ngomunye wabaphephayo.
"Three weeks ezidlulileyo lezi bafike emagodini lapho okugejwa khona uyazi babetshaya abantu, sinje so endaweni engaka kwakugijinywa utshaywa ngebhemba inkalakatha bethwele ihloka lemkhonto, zonke izinto ezilimazayo sithi siyareporter emapoliseni amapholisa khanya badla labo. Ah sokulabantu abanengi lapha ekuqaliseni lapha sasihlezi kuyizisebenzi zodwa, khathesi sokwaphongugcwala umuntu wonke osukale lale, umuntu uyafika awone ahambe ekwazi ukuthi kasoze abonakale futhi."
'Otsheketsha' bamelele ukudla eShangani Mine lapho abemba khona igolide lokunye. (Photo: Ezra Tshisa Sibanda)
Abesifazane kulindawo abendele kubotsheketsha labo bakhala ngokuhlukumyezwa ngomkabo. Unkosikazi Senzeni Zviripayi walinyazwa kabuhlungu ngumkakhe simthole ecatshisiwe komunye umuzi.
"Udubo mkhwenyana bakithi, ukutshaywa bakithi ubaba wangkwami bakithi njengoba ungibona ngimanxebanxeba nginje, nguye. Lamazinyo angisela ngenxa yakhe. Njengabantu laba abegolide laba abazwakali uyaphonguthi engavela khona etshwaleni bakhe komunye sikhathi engabuyi ngiyathi ngiyakhuluma ngitshaywe yikho umbona nginje."
Ngomgqibelo odlulileyo inhlamganiso yabo mama eye Shangani Women Empowerment ibe lohlelo lwemfundiso ngamalungelo okuhlukunyezwa kwabomama labantwana ngaphansi kwesihloko esithi “Stop Gender Based Violence against women and children. “ UNkosazana Tsitsi Khumalo ngowe Shangani Women Empowerment.
Uphekela 'otsheketsha' isitshwala lenyama eShangani Mine. (Photo: Ezra Tshisa Sibanda)
"Omama abanengi bayatshaywa kakhulu ngoba lapha kugcwele amakorokoza. Amakorokoza amanengi basebenzisa indaba zokuthi bona bayabe belemali okunengi abala sikhathi lakho ukuthi benakekele izimuli zabo. Ngenze iprogramme le eye Gender based Violence ngenxa yokuthi sihlangana labantwana abanengi aba abhuyuzwayo. Abanengi baya retshwa besehluleka ukukhuluma, so ngasengisithi ngcono ngenze iprogramme le ukwenzela ukuthi at least abantwana bekhululeke bebekwazi ukuthi bakhona abantu lapha abangaqonda khona bekhulume amaproblems abo bengayesabi."
Ngomnyaka ophelileyo umphathintambo obona ngendaba zekhaya, uMnu Kazembe Kazembe, wathi uhulumende wakhe ngeke afake abebutho ukuthi bancedise ukubamba otsheketsha ngesikhathi kulokukhathazeka elizweni lonke jikelele ngezimbamgodi ezazihamba zibulala abantu zisebenzisa amabhemba zibathathela imali kanye legolide ezaziwa ngokuthi ngamaShurugwi.
Amapholisa aweFort Rixon ayiwo akhangela lesisigaba alile ukukhuluma leStudio 7 athi sibhalele incwadi kunkokheli zabo eHarare. Abahlali beShangani Mine bathi izigebenga zizenzela umathanda njalo abakwazi ukuthi bazahlengwa ngubani kuloludubo.