Ibandla eliphikisayo eleRepublicans Party of Zimbabwe lithi lizancintisa kukhetho lwama by-elections ngomnyaka ozayo lolukamongameli ngomnyaka ka2023 loba umongameli walo, uMnu. Kwanele Hlabangana, wathola amavoti angafiki inkulungwane ezilitshumi kukhetho olwenziwa ngomnyaka ka2018.
UHlabangana uthi uzangena kukhetho lokudinga umongameli omutsha ngomnyaka ka2023 loba wakha phansi ngomnyaka ka2018.
Uthi okwamanje baqhuba inhlelo ezitshiyeneyo ezigoqela olokukhanga abatsha ukuba befunde ngokujulileyo ukusebenzisa ubulembu beInternet.
UHlabangana uthi bazakuba lohlelo lolu kunsukwana ezilandelayo okuzabe kulezifundi zamakolitshi amakhulu eZimbabwe.
Uthi ibandla lakhe lisekelwa ngabalandeli balo hatshi abakwamanye amazwe.
UHlabangana wathola amavoti afika phose inkulungwane ezilitshumi - 9,450 kukhetho lukamongameli olwenziwa ngomnyaka ka2018.
UMongameli Emmerson Mngangagwa, owanqoba kukhetho lolu, wathola amavoti afika phose izigidi ezimbili langxenye - 2,460,463 kwathi uMnu. Nelson Chamisa wathola edlula kancane izigidi ezimbili - 2,147,436.