UMnu. Obert Gutu, owayengumsekeli kamongameli webandla leMovement for Democratic Change elalikhokhelwa nguNkosazana Thokozani Khuphe, uthi ucabange ukungena kubandla leZanu PF ngenxa yokuthi kugcwele ubandlululo, ubukhohlakali lokunye kumabandla aphikisayo eZimbabwe.
UGutu, owamukelwe nguMongameli Emmerson Mnangagwa lomsekeli wakhe, uMnu. Constantino Chiwenge, ngesikhathi engena kubandla leZanu PF, utshele umsakazo weStudio 7 ukuthi ubesekhathele ngokwenzakala kumabandla aphikisayo.
“Kwakuxokozela kakhulu, kugcwele ubandlululo, ubukhohlakali lokunye okwenza ngizwe ngingumuntu olahlekileyo. Ukulwa okwenzakala kungcwatshwa uMorgan Tsvangirai kwangethusa. Laba ngabantu abephula isisekelo sombuso webandla labo.”
Uthi uzizwa ekhululekile emoyeni ngalokhu akwenzileyo.
“Lokhu engikwenzileyo kuhambelana lemicabango yami kwezombusazwe okunjengokulwisana le-neocolonialism, imicabango yami yokulwela abantu kuzwekazi leAfrica, ukulwela abantu abancindezelwa kakhulu. Ngilesifiso sokubathuthukisa. Akulabandla elingelamaphutha kodwa ngibone ukuba iZanu PF yilo ikhaya lami.”
Kodwa isikhulumeli sebandla leMDC-T, uMnu. Witness Dube, uthi hamba juba bazakucutha phambili.
Lokhu kusekelwa nguDokotela Nkululeko Sibanda, isikhulumeli sikamongameli webandla leMDC Alliance.
Umsekeli wesikhulumeli sebandla leMDC-T, uMnu. Felix Magalela Mafa, uthi uGutu unjengebele lendlela.
Kulamalunga ebandla leMDC Alliance amanengi okuthiwa asengena kubandla leZanu PF esithi selidilika ibandla elikhokhelwa nguMnu. Nelson Chamisa. Kodwa abalandeli balo bathi liqine kakhulu ibandla leli.
Your browser doesn’t support HTML5
UObert Gutu Uthi Sokuzalele Ingwe Kumabandla Aphikisayo