Bathabe okumangalisayo abantwana abadabuka eMatabeleland leNkabazwe abancediswe zinhlanganiso ezitshiyeneyo labantu abazimele bodwa ukuthi badinge indawo zokufundela ukuba ngabongi labongikazi.
Indawo okudingwa khona abongi ...
Abancedise abantwana abafika ikhulu lengxenye babadingele imali lokunye abangelakho ukwenzela ukuthi bayefika eHarare okuhlelo izifundo lokuzimisela kwalabo abafuna ukungena ezifundweni lezi.
Abanye abancedise ukuhambisa abafuna ukungena kuzifundo lezi bagoqela uMnu. Discent Collins Bajila okumanyamo weMDC Alliance, uMnu. Mlungisi Dube loMnu. Mbuso Fuzwayo abalwela ilungelo likazulu, uMnu. Michael Ndiweni okunhlanganiso yeBulawayo Vendors and Traders Association, uNkosazana Samukeliso Khumalo okunhlanganiso yeWomen's Institute for Leadership Development Trust labanye.
Benze lokhu kulandela ukutshiywa phandle komsebenzi lo kwabadabuka eMatabeleland leNkabazwe nyakenye njalo lokwehluleka kwabanengi ukuthi basebenzise ubulembu beInternet ukuthi badinge indawo zokufundela umsebenzi wabongi labongikazi.
UKirstin Nyathi ngomunye wabadinge indawo eHarare ...
Bathabe kakhulu abantwana abancediswe ngabantu laba ukuthi bayedinga indawo zokufundela umsebenzi lo eHarare.
Omunye wabo nguMelody Moyo owako Bulawayo othi sekulesikhathi edinga lumsebenzi.
“Mina besengidiniwe ukudinga umsebenzi wokuba ngumongikazi ngoba ngake ngazama kahlanu ngingatholi usizo. Ngingazi ukuba iapplication yami ihamba njani kodwa khathesi iapplication yami iboniwe njalo ngiye kuma interviews eHarare. Besingelathemba kodwa basincedisile saya kuma interviews.”
Lokhu kusekelwe nguNkosazana Conscience Ndlovu.
“Kungenze ngenelisa ukuba ukwazi ukwenza izinto ngendlela zakulenzi insuku-itechnolgy. Yonke into esisenzwa kulezinsuku yenzwa kumagagasi awe Internet. Sasebenzisa internet sancedisswa uku apulaya saze sabizwa lathi eHarare.”
UThembuluwo Moyo odabuka eSilobela uthi wathola imali yebhasi ngenxa yosizo luka Bajila labanye bakhe.
UMnu. Mlungisi Dube loMnu. Discent Collins Bajila
“UBajila wangincedisa uku applyer. Wanginceda ngoba ngangela internet. Ngangingela mali yebhasi yokuya eHarare, wathumela imali efika $200. Loba nje ngaswela indawo ngenxa yokungabi lecertificate ngiyambonga kakhulu.”
UBajila uthi wabambisana kuhlelo lolu labanye abambalwa.
“Esikwenzawo yikuncedisa abantwana abavela ezindaweni ezitshiyeneyo, asebepasile uForm 4 loba uForm 6. Kwasekukuvela ithuba lokuthi kuyabhaliswa abafisa ukuba ngomongikazi sasesithi sihlanganise amakhanda ukuthi singancedisa abanawethu.”
UNdiweni, omunye walabo abancedise kuhlelo lolu, uthi loba nje kungaba labantwana abazaphumelela kuhlelo lolu uncedo lulokhu lusadingeka.
UMnu. Michael Ndiweni
“Inkinga ezingahlangana lama candidates yikuthi abanengi bangaswela umbiko wokuthi baze emsebenzini. Kuthi abanye balakho ukuswela imali yokugada lokuthenga izinto ezifunekayo ezifana lama uniforms.”
UMlungisi Dube laye uthi basebenze kakhulu ukuthi abantwana laba benelise ukudinga indawo zokufundela ukuba ngabongi labongikazi.
Abantwana abahambe eHarare sebemelele ukuzwa ukuthi kuzaphumani kulokhu abakwethulela abaqhatshayo. Izifundo zabongi labongikazi ziqala ngoMvulo.
Your browser doesn’t support HTML5
Kuncedwa Abantwana Ukuthi Badinge Indawo Yokufundela Ukuba Ngabongi