Umkhokheli welinye lamacele ebandla leMDC-T, uNkosazana Thokozani Khuphe, ubesemthethwandaba waphezulu owe High Court ngoLwesibili, ephikisa isinqumo selinye icele lebandla leli elikhokhelwa nguMnu. Nelson Chamisa esimvimba ukuthi angasebenzisi ibizo lokuthi MDC-T kanye lempawu zalo.
Obesahlulela udaba lolu eHigh Court, uJustice Francis Bere, uthe usafuna isikhathi sokuhlaziya udaba lolu ngakho-ke umthethwandaba uzohlangana ngeviki ezayo mhla zingamatshumi amabili lane.
UMnu, Lucas Nkomo, obemele icele likaChamisa, uthe kade besemthethwandaba bezama ukuvimba uNkosazana Khuphe ukuthi engasebenzisi ibizo lokuthi MDC-T kanye le mpawu zalo.
Obemele icele likaMaKhuphe, uMnu. Lovemore Madhuku, uthe uMaKhuphe nguye okumele asebenzise ibizo lelo njalo ikhomishini ebona ngezokhetho izaphathisa ukuhluza lolu daba.
Osekela uMaKhuphe, uNkosikazi Thamani Moyo, uthe kalansolo ngokwenzekale emthethwandaba.
Ukuxabana phakathi kwebandla le MDC-T kuqale ngesikhathi owayengumongameli webandla lelo umuyi uMorgan Tsvangirayi wakhetha abanye abasekeli ababili khona kuvele kuloMaKhuphe.
Ngemva kokubhubha kukaTsvangirai idale leNational Executive Council yakhetha uChamisa ukuthi abe ngumkhokheli webandla kwasekuxotshwa uMaKhuphe.
Okuyikho osokukhokhelele ekuthini amacele womabili aqale ukulwela ukusebenzisa ibizo lokuthi MDC- T.
Your browser doesn’t support HTML5
Udaba Esilethulelwe NguBathabile Masuku