UKaren Bass, okudale leCongress kwele Melika owayengomunye wabantu ababese Zimbabwe ngesikhathi kusenziwa ukhetho ngoNtulikazi lonyaka, uthi kumele uMnu. Nelson Chamisa amukele impumela yokhetho ulusanda kwenziwa aqalise ukulungiselela ukhetho oluzakwenziwa ngomnyaka ka2023.
UBass, owayekuqula labahlolisisa ukhetho bekunhlanganiso yeNational Democratic Institute leye International Republican Institute, uthi ukhetho olusanda kwenziwa lwenziwa ngendlela eqondileyo kodwa lwaseluphazanyiswa yikubulawa kwabantu abayisithupha eHarare libutho mhlaka 1 Ncwabakazi.
Uthi akukhanyi kahle okwenzakala kwele Zimbabwe okwamanje ngoba kulabantu abanengi kakhulu abasola ukukhethwa kuka Mongameli Emmerson Mnangagwa lokwethulwa ngumthethwandaba weConstitutional Court owathi uMnangagwa wanqoba ngemfanelo kukhetho lukamongameli.
Uthi kwabanzima lakuye ukuthi amukele impumela yokhetho kwele Melika kulandela ukunwoba kukaMongameli Donald Trump.
“Ngibona engani kumele konke abakwenzayo bakwenze ngokuthula. Khangela ubone lokhu okwenzakala eMelika. Kangimthandi umongameli wakwele Melika. Sabalokhetho olwalungaqedakali lapha eMelika. Abantu abanengi babesithi umongameli kakhethwanga ngemfanelo. Kodwa loba kunjalo, nguye umongameli weMelika. Ngingatshona ilanga lonke ngisithi kangithandi ukuthi abengumongameli wakwele Melika kodwa-ke ngililunga ledale leCongress elisebenza liyingxenye kahulumende njalo yena ungumongameli. Ngilethemba lokuthi sizakuguqula lokhu ngomnyaka ka2020 kumbe kungakafiki umnyaka lowo.
“Ngibona engani kunzima lokhu. Imthethwandaba isithethe isinqumo sokuthi uMnangagwa nguye owanqobayo. Ngakho-ke angikwazi ukuthi kutshoni ukuthi engathi uMnangagwa nguye owanqobayo. UMnangagwa ngumongameli welizwe leZimbabwe. Ngilethemba lokuthi umanyano lo uzakwenza okusemthethweni njalo bazahlala bephikisa ngokuthula. Bathola isihlalo edale lephalamende, basephalamende ngakho-ke bayingxenye kahulumende.”
UBass ucebisa uChamisa ukuthi enze okusemthethweni.
“Engimcebisa khona uChamisa yikuthi kumele aqhubekele phambili esebenza lalabo abakudale lephalamende, aqhubekele phambili eqoqa abantu bakhe ukuthi balungiselele ukhetho olulandelayo.”
Ngezijeziso zenotho, uBass uthe, “Ukuthi siyazesula kumbe hatshi izijeziso zenotho kuyangokuthi uhulumende uzakwenzani. Engifisa ukukubona yikuthi uChamisa aphikise ngendlela eyiyo. Engingafisi ukukubona yikuthi uhulumende ephule ilungelo likazulu. Kangifisi ukubona ukulumende ebopha abantu amahlayana nje njalo esephula ilungelo likazulu. Amacele wonke kumele enze ukuthi kubelokuthula elizweni. Nxa kulokuthula elizweni, uhulumende wemelika usezabona ukuthi udlelana njani lohulumende weZimbabwe.”
Your browser doesn’t support HTML5
Ingxoxo Esiyenze loKaren Bass
UNkosazana Thabitha Khumalo, obambe isikhundla sesikhulumeli sebandla leMDC-T elikhokhelwa nguMnu. Nelson Chamisa, uthi kabasoze bamukele impumela yokhetho lukamongameli ngoba uChamisa wanqoba uMnangagwa ngamavoti amanengi.
Your browser doesn’t support HTML5
Ingxoxo Esiyenze LoNkosazana Thabitha Khumalo
Okwamanje uMnangagwa uthi sokumele abaphikisayo basebenze laye ukwenzela ukuthi kuthuthukiswe ilizw eleZimbabwe.