Abomanyano wamabandla aphikhisayo oweMDC Alliance bathi sebebuthanisa ubufakazi bokuthi bakhweze udaba lwabo emthethwandaba bephikisa impumela yokhetho eyethulwe ngabekhomishini ebona ngezokhetho eye Zimbabwe Electoral Commission (ZEC) ethe uMnu. Emmerson Mnangagwa webandla leZanu PF nguye onqobe kukhetho luka mongameli welizwe.
Umkhokheli weMDC Alliance, uMnu. Nelson Chamisa, uthi bazaveza ubufakazi bobuqili obenziwe ngabebandla leZanu PF bencedisana labe ZEC.
Ekhuluma emhlanganweni lentathelizindaba ngoMvulo eHarare, isikhulumeli sikaChamisa, uMnu. Nkululeko Sibanda, uthe inkokheli zalumanyano ibonisene ngenyathelo lokuyaphikisa impumela ye ZEC emthethwandaba.
“Amanyathelo azathathwa nguPresident Chamisa manengi. UMongameli Chamisa okwamanje ukhulumisana labantu abanengi abakubandla lakhe labaphandle kwebandla lakhe ukuthi azwe abafuna kwenzakale njalo kwenzeke ngendlela yiphi ngakho ngibona angani ngendlela yalokho lonyaka uPresident Chamisa uzaphumelela ekuthini kube lomongameli elizweni okhethwe ngabantu hatshi okhethwe yikhomishi,”
UDokotela Sibanda uthe loba bengela themba ngemithethwandaba yelizweni, bazaqhubeka ngaleyo ndlela kodwa bekhangela amanye njalo amacebo.
Unobhala welunga lebafundi ele ZINASU, uAshley Pfunye, uthe imithethwandaba yaselizweni ilembali yokusekela ibandla leZanu PF ngakho-ke sokumele kusetshenziswe ezinye indlela zombangazwe.
“Indaba esicatshangwe yiMDC Alliance ukuthi bakhangele imthethwandaba yona ilembali ethize nxa sikhangela udaba luka Morgan Tsvangirai laye wakewahambisa indaba yakhe emthethwandaba kodwa indaba yakhona yasicutshungulwa ukhetho selwadlula kudala so mina ngokubona kwami angiboni kugcina lokhu kuthandabuza , angiboni kusenza ukuthi bephumelele ngibona angani indaba yezombangazwe ifuna izenzo zombangazwe, kodwa ke nxa bethatha inyathela lokukuya emthethweni, yebo khonokho yinto enhle kodwa isikhathi esikiso sona ngicabanga ukuthi kumele bathathe inyathelo lezombangazwe.”
Amagqwetha awe MDC Alliance abikwa ehlangene izolo aphiwa bonke ubufakazi obuveza ubuqili be ZEC.
USibanda uphinde wathi ibandla lakhe likhathazeke kakhulu ngokuhlukuluzwa okwenziwa abasekeli balo ngamapholisa lama sotsha ngemva kodlakela oluqhamuke eHarare ngolweSithathu lweviki edluleyo.
Okhulume le Studio 7, uMnu. Milton Siziba, uthe uzulu eHarare ulokwesaba ngokuhlukuluzwa lokhu.
“Lokhu kuyasethusa njalo kuyasicaphula nxa sisizwa kuthwa amasotsha ahamba indawo ezithiyeneyo emalokitshini betshaya abantu nje njalo bekhangele labo abasekela ibandla eliphikisayo eleMDC. Lokhu njalo sikhathazeke kakhulu ikakhulu iviki ephelileyo sisizwa kuthwa amapholisa afike enza njalo kunthathelizaba ebezibuthene emhlanganweni we MDCeBronte Hotel, lokhu konke kusitshengisa ukuthi esikhathini esikiso ilizwe akumanga kahle , kolukwesaba okuthile ebantwini njalo besicela nje ukuthi ngabe lokhu kungaphela abantu sihlalisane kuhle.”
Kusenjalo amapholisa kanye lamasotsha akhuphe umbiko kumaphephandaba besithi imbiko yokuthi kulokuhlukuluzwa kwabantu elizwe ngamasotsha ayiqondanga.
Kodwa lokhu akuphathanga kuhle uzulu okhulume lentathelizindaba yeStudio 7 otshengise ukuthi iskhulumi samaphilisa uNkosikazi Charity Charamba kakho eqinisweni.
“Eqinisweni yikuthi sebetshaya abantu emalangeni adluleyo emabhawa asisakwanisi ukuthi sihambe siyenatha ngenxa yokuthi amasotsha ayafika endaweni eqalise ukuthi wonke umuntu kaphume eqalise ukutshaya wonke umuntu , konke kusegcekeni ukuthi umkhulumi wamapholisa uCharity Charamba kakho eqinisweni.”