Umuyi obeyisiphathamandla esomdlalo wenguqu uNdumiso Emmanuel Gumede usechazwe njengomuntu oqotho njalo odlale indima enkulu ekuthuthukiseni umdlalo wenguqu kwele Zimbabwe.
Isizwe seZimbabwe siqhubekela phambili silila ukwedlula emhlabeni kuka Ndumiso Gumede njalo ngitsho loMongameli welizwe uEmmerson Mnangagwa laye ukhuphe umbiko eduduza imuli yako Gumede ngokulahlekelwa kwayo.
UMongameli uMnangagwa uchaze uGumede njengomuntu obesazi umsebenzi wakhe okuyinto egcizelelwe ngabanengi abasebenza loGumede ngesikhathi eyisiphathamandla somdlalo wenguqu.
UVincent Pamire, othi ungomunye wabantu abakhuthaza uGumede ukuba aphenduke kwele Zimbabwe azosebenzela inhlanganiso yeZimbabwe Football Association ngomnyaka ka 1998, uthi akulamuntu obelunge njengo Gumede.
“Abanengi bakhangela okwabo kodwa uGumede akazange athathe ngitsho yona isenti elesikhala. Nguye yedwa umuntu engingamfakazela ngithi akazange athathe loba lona isenti elilodwa kunhlanganiso yeZIFA.
“Nguye owayezibambile kodwa akathathanga lutho. Abanye laba bagijimela ukuthenga imota ezinhle besebenza e ZIFA kodwa awungeke ubekwazi ukuthi imali bayabe beyithethe ngaphi. UGumede kazange abe layo imota enhle kodwa umsebenzi wakhe uyazikhulumela.”
Owake waba lilunga lephalamende emele indawo yeMakokoba uTshinga Dube, ongumsekeli omkhulu weqembu leHighlanders, uthI imisebenzi kaGumede kumele ikhunjulwe ngokuba khona kwenkokheli ezimqotho njengaye.
“Ukubongwa kwakhe okungenziwa yikuthi uyabona iflawuzi uma selisoma kusala inhlanyelo. Inhlanyelo leyo iyakhula kube ngelinye iflawuzi.
“Yinto esiyifunayo kulaba abatsha ukuba ababe yintanga ezakhupha amanye amaflawuzi enjengaka Gumede. Yiyo into esiyifunayo leyo.”
ULawrence Phiri, omunye osebenze loGumede kuqembu leHighlanders lakuqembu leNotwane elase Botswana, uthi labo abafuna ukufika kuzinga lika Gumede kumele babe lokuzithoba babe ngabantu abalo buntu.
“Silahlekelwe ngumuntu omkhulu njengabantu abakumdlalo wenguqu njengelizwe le Zimbabwe hatshi njengabantu beHighlanders kumbe abantu bako Bulawayo kuphela, kubuhlungu.
“Ubukhokheli bona vele yisipho njalo uGumede ubelesipho esokusebenza labantu njalo ukuzehlisa akade ekwenza kumenze ayehluke kakhulu kwezinye inkokheli. Wayehlanganisa konke lobuntu njalo wayehlala ejabula ngoba esazi ukuba kwezemidlalo kumele ukholise.”
Owake waba ngumgcinisihlalo weqembu leHighlanders, uRoger Muhlwa, uthi uGumede ubethandwa ngumuntu wonke ngoba ephila impilo emsulwa.
“Into eqakathekileyo bakithi yikuthi wonke umuntu azazi ibizo lakhe njalo aligcine limsulwa. UGumede wagcina ibizo lakhe limsulwa njalo akulanto uGumede ayesiba lenhloni ngayo empilweni. Wayengena loba kuwuphi umbuthano ubone bonke abantu bebobotheka. Khathesi abanengi bayafika embuthanweni bakhangele uzwe besithi angeke ngihlale lapha ngoba kulabo bani bani.
“Yiso isifundo engisifunde ku Gumede ukuba phila impilo emsulwa, ukuze uphile ukhululekile emphakathini.”
UGumede wedlule emhlabeni ngoLwesithathu emini ngemva kokuba ekhale ngokuba isisu sibuhlungu ngoLwesibili.
Ubeseleminyaka engamatshumi ayisikhombisa lesithupha eyokuzalwa njalo ngesikhathi ebhubha ubengumongameli weqembu leHighlanders.
Iqembu leHighlanders likhuphe umbiko ngoLwesithathu lisithi uGumede ulitshiye esikhaleni njengoba belilokhu lithapha kuye ulwazi.
Abantu babuthene kunombolo 12 Cheltenham Road eMontrose koBulawayo.