Uzulu weZimbabwe wamukele ngenjabulo inyathelo elithethwe ngowake waba ngumsekeli kamongameli, uNkosikazi Joice Mujuru, lokuveza afisa ukukwenzela ilizwe kugwalo lwakhe lweManifesto oluchaza uhlelo alubiza ngokuthi yiBlue Print to Unlock Investment and Leverage for Development-BUILT, olulakho ukuhlenga ilizwe kusimo esibi somnotho elikilo okwamanje.
Lokhu kuza ngemva kokuphuma kogwalondaba olusayinwe nguNkosikazi Mujuru, oluchaza afuna ukukwenzela uzulu lanxa engakacaci ukuba sekuyindlela yokungena enkundleni yezombusazwe ukuphikisana loMongameli Robert Mugabe na loba hatshi kulungiselelwa ukhetho luka 2018.
Umkhokheli wenhlanganiso esanda kubunjwa, ekhankasela ukuthuthukiswa kwezigaba zemaphandleni,ye Growthedge Development Program, uMnumzana Zisunko Ndlovu uthi akukho okubi ukuthi umuntu aveza izifiso zakhe njengalokho osekwenziwe nguNkosikazi Mujuru kugwalo lwakhe oluphume kumaphephandaba abalisa ele Newsday lele Daily News ngoLwesibili.
Okudingwa nguzulu, uNdlovu uthi ngumuntu ozaphathisa isizwe, sikhululwe kulobu bunzima esibhekane labo, kungelani ukuba lowo muntu uvela kuliphi ibandla lezombusazwe.
Lokhu kusekelwe nguMnumzana Lizwe Maseko wase Hatfield othi laye akaboni okubi ngenyathelo elithethwe nguNkosikazi Mujuru.
Lanxa engazange alandule loba ukuvuma ukuthi lologwalondaba luvelele ngakuye,yehlule imizamo yokukhulumisana lowake waba ngumsekeli kamongameli lo esithi wavele wakubeka sobala ukuba akafuni ukukhulumisana lentathelizindaba, kodwa ugwalo lwakhe lweManifesto eluse kwabezindaba.
Your browser doesn’t support HTML5
Udaba Silethulelwa nguMavis Gama
Isikhulumeli sabasekela uNkosikazi Mujuru, uMnu. Rugare Gumbo ucasisele uChris Gande weStudio Seven ukuthi bethule ugwalo lolu olutshengisa ukuthi nxa bengathola umbuso bazavuselela njani inotho ngenhloso yokutshengisa uzulu ukuthi lokhe elaso isifiso sokumsebenzela njalo lokuthi aphe imbono yakhe ngaleli nyathelo.
Your browser doesn’t support HTML5
Ingxoxo loMnu. Rugare Gumbo
Silokhu sikudaba lunye, uChris Gande uphinde waxoxa lengcwethi kwezombusazwe, uMnu. Nhlanhla Dube, ukuze sizwe imbono yakhe ngaloludaba.
Your browser doesn’t support HTML5
Ingxoxo loMnu. Nhlanhla Dube