UNkosikazi Joice Mujuru, umkhokheli webandla le Zimbabwe People First eliphikisa ukulumende kaMongameli Robert Mugabe, uthi usefuna ukuhlawula umlungu owathathelwa ipulazi ngumkakhe umuyi uGeneral Solomon Mujuru.
UMujuru wenze umhlangano ngoLwesine eBhilithane loMnu. Guy Watson Smith, owayengumnikazi weAlmein Farm eBeatrice duzane leHarare. Ababili laba benze inkulumo zakuqala ezokudingisisa ukuthi uMujuru engahlawula njani imuli kaSmith.
Lokhu kukhangelelwe ukuthi kuzaqhubekela phambili udaba lolu luze lulungiswe. Isikhulumeli sebandla leZimbabwe People First, uMnu. Jealous Mawarire, uthi inkulumo kaMujuru loSmith itshengisa ukuthi ibandla leli lifuna ukuthi sonke isizalwane seZimbabwe siphile kahle elizweni njalo kulungiswe ezomhlabathi njengoba abanye abantu abathathela abamhlophe amapulazi bengalimi lutho emapulazini lawo.
Methuseli Moyo, umsekeli wesikhulumeli sebandla leZimbabwe People First uthe ibandla lakhe lithakazelela okwenziwe nguMujuru.
Uthe kuyaziwa ukuthi abalandeli bebandla leZanu PF bazachothoza uMujuru ngalokhu akwenzileyo. UMoyo uthe abalandeli bebandla leli kabakhulume abakufisayo loba nje selidumela emansumpeni ukuthi kube lombuso omutsha njalo obalulekileyo kwele Zimbabwe.
Your browser doesn’t support HTML5
Ingxoxo Esiyenze LoMnu. Methuseli Moyo
Ele Zimbabwe lasungula uhlelo lokuthatha amapulazi abamhlophe ngomnyaka ka2000. Abamhlophe abedlula inkulungwane ezintathu bathathelwa amapulazi yiziphathamandla zebandla elibusayo eleZanu PF kanye labalandeli balelobandla.
Lokhe befuna ukuthatha amanye amapulazi loba nje abalimi abamhlophe bengakaze bahlawulwe yilabo abawathathayo.