Amalunga ebandla leMthwakazi Republic Police abotshwe ngoLwesithathu amiswe phambi kwamapholisa eCentral Police Station behlolwa nguAmbrose Floyd ukuba babeyingxenye yalabo abahamba epulazini lika Mnu. Brian Davies eNtabazinduna bamxotsha besithi uhluthuna leyondawo.
Bathe beqeda lokhu, bahanjiswa emthethwandaba lapho abetsheswa amacala okutshengisela phandle kwenkamba yamapholisa eBulawayo Central Police Station ababecabangela ukuthi kuvalelwe umkhokheli wabo, uMnu. Mqondisi Moyo, osedingwa ngamapholisa lamasotsha ahlomileyo.
Abamiswe phambi kuka Ambrose lemthethwandaba ngu Sibongile Banda, Tinos Nkomo , Livson Ncube , Maxwell Nkosi , Mongameli Mlotshwa, Welcome Moyo, Nkosilathi Ncube, Ackim Ndebele loBusi Moyo.
Abanye ababotshwe eCentral Police Station ngoLwesithathu abetheswa amacala okutshengisela enkambeni le. (Courtesy Photo: Mthwakazi Republic Party)
Igqwetha labo, uMnu Prince Butshe Dube, uthi ababotshiweyo bavalelwe eGrey Prison njalo bazaphenduka edale mhlaka 16 Mbimbitho belinde ukucela imali yesibambiso - ibail.
Abadutshulwe bephandle kwenkamba yamapholisa nguNxebalendoda Ndlovu, Gladwell Ndlovu, Nqobile Moyo, Ntuthuko Khumalo, Muzi Mlotshwa loLwazi Khanye.
Kusenjalo umkhokheli weMRP, uMnu. Mqondisi Moyo, ucatshile kulandela ukudingwa ngamapholisa lamasotsha ahlomile. Bathi watshaya amapholisa eNtabazinduna.
UMnu Moyo uthi, “Izolo emini amaLawyer uDumisani Dube loPrince Bhutshe beyefika eCentral Police Station belungiselela amalunga ethu abaotshiweyo ukuya edale lamhlanje baziswa ngamapholisa ukuba ngiyadingakala loPaton Xaba bethi NgoMvulo satshaya amapholisa labantu baka Floyd Ambrose. Okungimangalisayo yikuthi iZimbabwe iphethwe ngabantu abalamanga abantu bomthetho ngoba ngakhulumisana labo ngithi ababambe kuhle umthetho. Okungidanisayo izolo kuze amapholisa lamasotsha ehlomile okuveza obala ukuba bebezoganga kumbe ukungithumba.”
Ilunga lebandla leZANU-PF, uMnu. Joseph Tshuma, usole isenzo samalunga ebandla leMRP ngokuyabhikisha eCentral Police Station.
Abalwela amalungelo oluntu sebethe basola ukudutshulwa, ukutshaywa lokubotshwa kwamalunga ebandla leMRP besithi uhulumende ulokhe eqhubeka ngesandla esilukhuni. NgoLwesine enzikini yakoBulawayo bekulamasotsha lamapholisa ahlomileyo ngesikhathi amalunga eMRP esiye emthethwandaba.
Your browser doesn’t support HTML5
Amalunga eMthwakazi Republic Party Avalelwa Entilongweni