Amabandla aphikisayo ayaxokozela okumangalisayo eZimbabwe ngesikhathi kulungiselelwa ukhetho oluzakwenziwa ngomnyaka ka2023.
Amabandla agoqela eleMDC Alliance, iMthwakazi Republic Party lamanye kukhanya azazimela ekhethweni lolu okungenza ibandla leZanu PF linqoba ezabelweni zonke.
Ibandla leMDC Alliance, eselithathelwe ibizo ngele MDC-T elikhokhelwa nguMnu. Douglas Mwonzora lithi liyafisa ukusebenza lamanye amabandla ukwenzela ukuba kususwe eleZanu PF embusweni.
Kodwa lithi lethuswa lubandlululo lwamabandla anjenge MRP ethi imele abantu abahlala eMatabeleland leNkabazwe kuphela.
UMnu. Felix Magalela Mafa, umsekeli wesikhulumeli sebandla leMDC Alliance, uthi kuyamangalisa okwenziwa libandla leMRP, elikhokhelwa nguMnu. Mqondisi Moyo.
UMafa uthi akumelanga abantu bakhethwe ngomhlobo wabo.
Uthi kumele kuguqulwe indlela okwenziwa ngayo ukhetho njalo bafisa ukusebenza lamanye amabandla.
Your browser doesn’t support HTML5
UMqondisi Moyo oweMthwakazi Republic Party loFelix Magalela Mafa Okubandla leMDC Alliance Bakhuluma Ezombusazwe
Kodwa uMoyo uthi benza okuhambelana lowenziwa ngababusa kungakabi leZapu, iZanu PF lamanye amabandla.
Uthi bafuna ukulwisana leZanu PF bebodwa eMatabeleland leNkabazwe ngoba iZanu PF leMDC Alliance zimbila zantabanye.
Kulamabandla amanengi eZimbabwe akhangelelwe ukuba azangena kukhetho oluzayo. Abacubungula ezombusazwe bathi lokhu kuzakwenza ukuba ibandla leZanu PF linqobe kukhetho njengenhlalayeza.