UMongameli Robert Mugabe ukhangelelwe ukuya kwele Botswana lapho okuzathakazelelwa khona iminyaka engamatshumi amahlanu lelo lizwe lathola uzibuse.
Abazi ngokwenzakalayo ewofisini kaMugabe bathi ukhangelelwe ukuthi uzakuya kulelo lizwe kusasa.
Obona ngokwethulwa kwembiko ewofisini yakhe, uMnu. George Charamba, walile ukukhuluma ngodaba lolu. Kodwa ezinye intathelizindaba ezisebenza kumaphephandaba adlelana lohulumende zithi kusobala ukuthi uMugabe uzakuya kwele Botswana.
UMongameli Ian Khama usanda kukhuthaza uMugabe ukuthi asuke embusweni esithi useluphele ngakho-ke sokumele kungene omunye umuntu esikhundleni sakhe.
Lokhu kucunule abantu abasekela ibandla leZanu PF leziphathamandla zikahulumende ezithi uKhama ukhulume kubi ngoMugabe.
Ingcwethi kwezombusazwe esikhulume lazo zithe ababili laba bakhengelelwe ukuthi bazakhuluma ngodaba lolu eBotswana. Isizalwane seZimbabwe esihlala kwele Botswana, uMnu. Calton Tembo, okunhlanganiso yabatshengisela ezitaladini eye Speak Out, utshele iStudio 7 ukuthi kuzaba nzima ukuthi batshengisele duzane lalapho okuzabe kulenkokheli yamazwe atshiyeneyo ngesikhathi kunanzwa ilanga likazibuse eGaborone.
“Okwamanje yikuthi akulalutho esilulungisileyo indaba le isijumile, besingazwanga ukuthi uMongameli Mugabe uyabuya eBotswana. Mina ngikuzwe esukeni. Isikhathi sokuthi sitshengisele ezitaladini angiboni ukuthi sisakhona.”
Izizalwane zeZimbabwe ezihlala eMelika zitshengisele ezitaladini ngeviki ephelileyo uMongameli Mugabe esenhlanganweni wamazwe omhlaba owe United Nations General Assembly.
UMugabe uchothoze ukutshengisela lokhu esithi abantu laba bathunywe ngamazwe entshonalanga ukwenzela ukususa ibandla lakhe embusweni.