Inkokheli yamabandla aphikisa elibusayo eleZanu PF kukhanya ijayele ukulwela izikhundla mihla yonke ngesikhathi ilizwe leZimbabwe lithwele nzima ngokugugudeka komnotho okumangalisayo.
Banengi abantu beZimbabwe abafuna ukuthi kubelenguquko elizweni. Bathi lokhu kungenzakala nxa amabandla aphikisayo angabambana kungakenziwa ukhetho oluqakathekileyo ngomnyaka ka2018.
Kodwa-ke lokhu kukhanya kuphambaniswa yikulwela izikhundla kumbe ukubaleka kwabasekeli bawo ababona engani amabandla abo abadonsela emnyameni. Kujayele ukuba lokuxokozela kumabandla anjenge Zimbabwe People First, People’s Democratic Party, MDC-T, MDC-N lamanye ambalwa.
Your browser doesn’t support HTML5
Ingxoxo Esiyenze LoMnu. Abednico Bhebhe LoMnu. Methuseli Moyo
Ukuze sihlaziye udaba lolu, iStudio 7 ixoxe loMnu. Methuseli Moyo, umsekeli wesikhulumeli sebandla leZimbabwe People First ekhokhelwa nguNkosikazi Joice Mujuru loMnu. Abednico Bhebhe, unobhala obona ngenhlelo ezitshiyeneyo kubandla leMDC-T.
UMoyo uthe, “Sokungumkhuba wabantu bezombangazwe kumabandla wonke kusukela kwelibusayo kusiya kwephikisayo ukuthi nje kube lengingathi yikungezwani. Kwesinye isikhathi lokhu kwenziwa yikuthi kulokukhululeka kumabandla aphikisayo ngoba uzulu ulakho ukukhuluma lokwenza intando yakhe.”
UMoyo uthe okunye okwenza kubelokuxokozela lokhu yikuthi abanye abantu bakhonza inkokheli zamabandla.
UBhebhe uvumelane laye esithi akumelanga abantu bakhonze inkokheli ngoba uzulu nguye okumele olamandla.
Uthe kumele amabandla aqhubekele phambili ngenkulumo yokubumba umanyano wokuncintisana lebandla leZanu PF kukhetho oluzakwenziwa ngomnyaka ka2018.