Kuyaxokozela kubandla leMDC-T elikhokhelwa nguMnu. Douglas Mwonzora, okubanye abacabangela ukuba uMwonzora watshontsha izigidi eziyisithupha zamadola eZimbabwe - $6 million.
Sebebanengi abathi uMwonzora waqambula imali yebandla leli ngesikhathi kulungiselelwa ukhetho nyakenye lokudinga ozangena esikhundleni sikamuyi uMorgan Tsvangirai.
Omunye wabo, uMnu. Kudzanai Mashumba, otshaywe ngoMvulo ngabatsha abebandla leMDC-T, uthi usebophisa abatsha laba.
UMashumba uthi lokhu elilunga lebandla leMDC-T hatshi lokhu okukhulunywa yinkokheli yebandla leli ethi kudala wasuka.
Kodwa uMnu. Witness Dube, obona ngokwethulwa kwemibiko kubandla leli, uthi uMashumba usenga ezimithiyo.
Kusenjalo, uMnu. Sybeth Musengezi, ofisa ukuba uMongameli Emmerson Mnangagwa asuswe esikhundleni sokhokhela ibandla leZanu PF, uthi ngamanga aluhlaza tshoko ukuba kayisilo lunga lebandla elibusayo. Utshengise umsakazo weSTUDIO 7 amakhadi amabili aveza ukuba ulilunga lebandla leZanu PF.
UMnu. George Charamba, isikhulumeli sika Mnangagwa, wethule umbiko enkundleni yokuxhumana eyeTwitter esithi uMusengezi kayisilolunga lebandla leZanu PF. Lokhu kugcizelelwe nguMnu. Tafadzwa Mugwadi, okhokhela uhlangothi olubona ngokwethulwa kwemibiko kubandla leZanu PF. Ababili laba kasibatholanga namuhla ukuze sizwe imibono yabo ngokuvezwe nguMusengezi.