Amalunga enhlanganiso yeCitizens Under Bondage athi ibandla eliphikisayo eleMovement for Democratic Change elikhokhelwa nguMnu. Nelson Chamisa yilo elenza abantu bahlupheke kwele Zimbabwe hatshi ibandla leZanu PF.
Abalandeli benhlanganiso le bethule lokhu eHarare namuhla lapho abathe inhlupho zonke eZimbabwe zidalwa libandla lika Chamisa elingafuni ukungena kumanyano wePolitical Actors Dialogue okhokhelwa nguMongameli Emmerson Mnangagwa.
Lokhu kwethulwe nguMnu. Alligator Moyo, umkhokheli wenhlanganiso le abanye abathi isekela ibandla elibusayo.
“Uhulumende weZimbabwe akalani lendubo esihlangana lazo. Singakhangela lokho okwatshiwo nguMnu Chamisa ukuba wayese Europe esithi izinto zibe nzima kwele Zimbabwe.”
Kodwa omela abatsha kubandla leMDC, uMnu. Gift Ostallos Siziba, uthi ngamanga aluhlaza tshoko okukhulunywa ngamalunga eCitizens Under Bondage.
“Abantu ababulala umkhonomi lowu ngabantu beZANU PF. Kabazwisisi ukuthi umkhonomi usebenza njani. Umkhonomi usebenza ngokuzwisisana phakathi kwabantukazana lohulumende. Umkhonomi ufuna ukuba uhulumende enze izinto ngendlela elungileyo.”
UNkosikazi Rutendo Sibanda uvemelana loSiziba.
“Nxa singakhangela indubo esibhekane lazo, zihlupha wonke umuntu kungelani lebandla. Wonke umuntu uyakwazi okubangela indubo zethu eZimbabwe. Inkohlakalo ekubandla leZANU PF yiyo ebangela indubo esilazo.”
Lokhu kusekelwe njalo nguMnu. Cleopas Banda, othengisa impahla etshiyeneyo eHarare.
“Singaqambelani amanga. Indubo esihlangana lazo njenge Zimbabwe zibangelwa libandla leZANU PF. Singakhangela indaba zabantu abatshontshayo … zivela kubandla leZANU PF. Yizo okumele zilungisiswe.”
EleZimbabwe libhekane lendubo ezigoqela ukuswelakala kwemali, imisebenzi, amafutha ezimota lokukhuphuka mahlayana kwentengo yempahla.
Your browser doesn’t support HTML5
Inhlanganiso yeCitizens Under Bondage Ikhala Ngokwenziwe Libandla leMDC