Abalandeli bebandla leMDC abamiswe emthethwandaba ngoMvulo besetheswa amacala okubangela ubudlwangudlwangu eChitungwiza ngempelaviki, bavalelwe entilongweni kulandela isinqumo esenziwe ngumantshi othe balakho ukuphazamisa ubufakazi benganikwa isibambiso se-bail.
Amapholisa avimbe emthethwandaba eChitungwiza. (Photo: Mlondolozi Ndlovu)
Abalandeli laba ababotshwe phandle kwendlu kaMnu. Job Sikhala eSt. Mary’s, lapho akade bebuthene khona ngoMgqibelo, bamiswe phambi komthethwandaba eChitungwiza.
Umtshutshisi waloludaba, uNkosikazi Rumbidzai Mushonga, uthe ababotshiweyo laba babuthana ekuseni ngoMqgibelo eSt. Marys eChitungwiza okungekho emthethweni befuna ukwenza udlakela.
UMushonga uthe ababotshiweyo laba batholakala belamarekeni, amatshe lengqamu njalo abanye babo abalikhulu lamatshumi asiyisitshiyagalombili basadingwa ngamapholisa.
Igqwetha labo, uMnu. Moses Nkomo ucele ukuthi idale libaphe imvumo yokuthoniswa besuka ngekhaya esithi akulabufakazi obuveza ukuthi balamacala.
Abamele izibotshwa zebandla leMDC elikhokhelwa nguMnu. Nelson Chamisa.
Okhokhela inkamba yamapholisa eChitungwiza, uNkosikazi Tsitsi Mharadzano, utshele umthethwandaba ukuthi kungaba lobudlwangudlwangu eChitungwiza nxa ababotshiweyo laba bengakhitshwa entolongweni.
UMantshi uVongai Muchuchutu uthe angeke abanike isibambiso se-bail okwamanje ngoba balakho ukutshotshozela ubudlwangudlwangu.
UNkomo uthi bafuna ukuthi izibotshwa lezi zinikwe isibambiso se-bail.
“Thina sikhulume okusegcekeni ukuthi kumele baphiwe imvumo yokuthoniswa besuka ngekhaya kodwa umantshi walile ukuthi ababotshiweyo baphiwe imvumo yokuthoniswa besuka ngekhaya.”
UMnu. Job Sikhala uye emthethwandaba eChitungwiza. (Photo: Mlondolozi Ndlovu)
Elinye njalo igqwetha labo, uMnu. Jeremia Bamu, uthe lokhu okwenzakale namuhla akukho emthethweni.
“Isinqumo lesi ayisiso esikade sikukhangelele. Iqiniso yikuthi lowu owababophayo kala lapho abambanisa khona ukuba yibo abaphambanisayo. Okukhona yikuthi udlakela lwaba khona sebebotshiwe akungeke kusetshenziswe ukubabopha. Umthetho uyakhangela ukuthi bangabaleka na loba hatshi, idale kalikhangelanga konke lokhu.”
Ingcwethi kwezombusazwe, uMnu. Mlungisi Dube, uthi ukubotshwa kwabalandeli bebandla leMDC kutshengisa ukuba uhulumende kaMongameli Emmerson Mnangagwa uyafana lokamuyi uRobert Mugabe, owasuswa esikhundleni libutho ngomnyaka ka2017.
Okwenzakale eChitungwiza (Photo: Thomas Chiripasi)
“Kuyinto edanisayo kakhulu. Kutshengisa ukuthi uhulumende kaMnangagwa nguhulumende olochuku. Akula new dispensation ngenxa yokubana abasekeli bebandla eliphisayo baqhubeka behlukunyezwa nguhulumende.”
Banengi abantu abayalelwe ukungena emthethwandaba. Omunye wabo nguMnu. Kudzanai Mashumba, owenhlanganiso ezimele yodwa eyeZimbabwe Protection Forum.
“Bathe ngingangeni edale ngoba bengihamba lo(Job) Sikhala. USikhala ngumngane wami. Ngizwe ubuhlungu kakhulu ukuthi amapholisi angalise ukungena loSikhala.”
Bekugcwela amapholisa emthethwandaba kuthi njalo phandle kwenkantolo bekulabanye abalandeli bebandle leMDC akade begijinyiswa ngamapholisa ngoba bebezama ukungena kuleyondawo.
Kuphoswe intuthu ehitshayo endaweni okubizwa ngokuthi yiC Junction obesokuhlukunyezwa abanye abantu ngamapholisa. Isikhulumeli samapholisa uSenior Assistant Commissioner Paul Nyathi walile ukukhuluma leStudio 7 ngodaba lolu esithi ukukhefu.
Your browser doesn’t support HTML5
Udaba Esilethulelwe NguMlondolozi Ndlovu