Amalunga amabandla ezokholo ahlala kwele South Africa adabuka eNyabane ePlumtree, asesungule umkhankaso wokusekela ukwakhiwa kwekilinika kule indawo ukwenzela ukuba abantu bengahambi umango omude bedinga uncedo lokwelatshwa.
Amakholwa aphuma emabandleni atshiyeneyo adabuka eNyabane abethe gwaqa eNumber 4 John Brandy elokitshini leAlexandra eJohannesburg, emkhosini wokudinga imali yokwakha ikilinika esigabeni sakibo.
Baqoda imali yokwakha ikilinika ePlumtree. (Photo: Greatman Mkhwebu)
Omunye obekulo umkhosi, uMnu. Alfios Mabhena, uthi babone kuqakathekile ukuthi baphatheke kulo umkhankaso ngemva kokunanzelela udubo olubhekane lezigulane esigabeni sabo.
“Sibabonile abantu befika ngokuzikhandla bavela eTsholotsho, Lupane, Nyathi and iKezi ngokunjalo. Sibonga indlela abantu abanikele ngakhona benikelela amakholwa eNyabane kunikelelwa iclinic ukuthi sifake intuthuko endaweni yase Nyabane ikhule sibe lesandla lathi njengamakholwa eNyabane njengoba incwadi ithi ukholo olungenamsebenzi lufile.”
Nyangazonke izakhamizi zeNyabane zitshaya imali yokwakha ikilinika le. UNkosikazi Sitholile Ndebele, ophuma koMalilonda, uthi isazoqhubeka imikhankaso yabo yokudinga imali ize iphele ukwakhiwa ikilinika yabo.
“Umsebenzi ubemuhle kakhulu. Umsebenzi obugoqela amakholwa wonke. Siyathemba ukuthi langesikhathi esizayo ma silicela lizobakhona ngobunengi benu. Isifiso sethu yikuthi sizakhele umtholampilo endaweni yakithi enyabane.”
Amabandla okholo asebuthelela imali yokwakha ikilinika ePlumtree. (Photo Credit/Greatman Mkhwebu)
Odabuka esigabeni lesi, uMnu. Greatman Mkhwebu, uthi yinto enhle kakhulu eyenziwe ngamakholwa la.
“Abekhona lakudala amabandla amamissionaries abefaka isandla athuthukise ezemfundo. Kuyinto enhle kakhulu mhlawumbe singafunda kakhulu ukuthi amabandla aqakathekile emphakathini. Amabandla ayinsika yomphakathi ngokunjalo mina ngibona vele sengathi ikilinika seyiphelile ukwakhiwa lobanje ingakaqali isiyasuka loba yinini.“
UMnu. Mkhwebu uthi uhlupho olukhulu yikuthi ikilinika eseduze isendaweni yeTshankwa ehleli igcwele phamu izigulane. Uthi njalo kubanzima ikakhulu ebantwini abadala ukuthi bayefika ekilinika le, ikakhulu nxa izulu lisina njalo imifula igcwele.
Amabandlala enelise ukuqoqa imali eyedlula amarandi azinkulungwane ezilitshumi lambili - R12,000.
UMnu. Mkhwebu uthi basazoqhubeka ngale imikhankaso besiya endaweni ezitshiyeneyo. Uthi okwakhathesi inengi lokusetshensizwa nxa kusakhiwa, okugoqela izitina, sekukhona okuzakwenza ukuthi ukwakhiwa kwekilinika yabole kuqale loba nini.
Your browser doesn’t support HTML5
Amakholwa Aseyakha Ikilinika ePlumtree