Izisebenzi zeChitungwiza Town Council ezedlula amakhulu amabili lamatshumi amathathu – 230 – ezaxotshwa umsebenzi zitshengisele lamuhla phandle kwamawofisi ekhansili le zifuna ukwazi ukuthi zizaphiwa nini imali zazo.
Zithi kumele zithole imfanelo yazo njengalokho okumumethwe yiziqondiso zomthetho weLabour Amendment Bill esanda kwethulwa.
Iziqondiso lezi zithi zonke izisebenzi ezaxotshwa umsebenzi kulandela isinqumo esethulwa lidale leSupreme Court ngoNtulikazi esithi umqhatshi ulakho ukugumula isisebenzi engazibhadali lutho, kumele aphiwe ingcosana yemali ayisebenzelayo.
Izisebenzi lezi zihlangane lomqondisi wekhansili ongatshongo lutho ngalokhu.
Ukuze sihlaziye udaba lolu, sixoxe lomqondisi weZCTU, uMnu. George Nkiwane, othe izisebenzi ezixotshwa umsebenzi kumele zibuye emawofisini abo.
Uthe bazanceda abahlulukelweyo ngokuhambisa udaba lwabo emthethwandaba.