Abazali abalabantwana abakhangelelwe ukuqala izifundo zikaForm 1 lonyaka bakhala ngokuhlawuliswa imali yezifundo ephezulu kakhulu.
Bathi kuyamangalisa ukuthi izikolo zibiza izimali enengi engahambelani leholo labo.
lholo lezisebenzi ezinengi liphansi ngesikhathi inengi labantu lisithi alisenelisi ukuziphilisa ngenxa yentengo yempahla ezimqoka kanye lokudla ekhuphuka nsuku zonke.
UNkosikazi Zanele Moyo, umzali olomntwana othole indawo esikolo ozafunda ehlala kiso, uthi wephuke inhliziyo ngenhlawulo efunwa yisikolo.
“Ngikhathazeke kakhulu ngendaba yama school fees okumele siwabhadale siyabhadala amaschool fees asiyali kodwa esicela ukubakwazi kuqala yikuthi siyabhadala amafees sibhadalela ama months amangaki uyathola ukuthi siyabhadala izikolo zivulwe end of March ngapha ukhiphile iUS$400. Uhulumende imali le uthini ngayo ngoba imali le inzima ukutholakala siyahlukumezeka kakhulu.”
UNkosikazi Sukoluhle Ndlovu, umgcinisihlalo weMatebeleland North kunhlanganiso yeAmalgamated Rural Teachers Union of Zimbabwe, uthi kuyisimanga okwezakalayo.
“Sidabukile kakhulu sisizwa ukuthi abantwana abadinga indawo kaForm 1 kumele bebhadale imali yokungena. Nxa sikhangele umumo welizwe khathesi sikulockdown. Abantu abanengi bebevalelwe phandle njalo bekuphakathi kwenyanga abantu abanengi bebengakatholi imali yokuthi babhadale. Thina sesijayele ukuthi umtwana ubedinga indawo ayiphiwe nxa sekuzavulwa izikolo umtwana sebhadala njalo ukuthi babhadala bengakwazi ukuthi iterm iqala nini thina konke lokhu siyakusola sithi uhulumende ngabe uyabona ukuthi uyenzani ngezikolo zonalezo.
Imizamo yokuxumana labaphathi bezikolo kanye lamalunga amakhomiti okuthuthukisa izikolo amaSchool Development Committee ezikolweni ezimbalwa koBulawayo yehlule ngoba benqabe ukuphendula imbuzo bethi abakhulumisani ngenhlawulo zezikolo lentathelizindaba.
Izisebenzi zikahulumende yizo ezihlaba omkhulu umkhosi ngoba iholo lazo lingaphansi kakhulu kwesikhwama esanela ukunakekela imuli elabantu abahlanu esikhuphuke saya kunkulungwane eziphose zifike amatshumi amathathu zamadollar - $29,924 ngenyanga kaZibandlela.
Izikolo ezimbalwa ezifunda abantwana behlala khona ezamaboarding schools, zihlawulisa amadola eMelika alikhulu lanhlanu – US$150 phambi kokuba umntwana aphiwe indawo kuthi lezi ezihanjwa nsuku zonke zifuna amadola alitshumi lanhlanu – US$50 phambi kokuba umntwana aphiwe indawo.