Ngalesi sikhathi eleZimbabwe libhekane lobunzima kwezenotho kulezinye izifundi zemakolitshini esezisungula amankampani loba nje umnotho usesimeni esibi.
Labo abasungula amankampani badala imisebenzi elizweni lapho inhlanganiso ezizimele zodwa ezithi inani labangasebenziyo liyedlula isilinganiso sokungamatshumi ayisithiyangalo mbili ekhulwini – 80%.
Loba nje kungaziwa ukuthi manengi kangakanani amankampani asungulwa yilabo abasuka emakolitshini, akhanya emanenganyana.
Umnu, Douglas Nyathi umnikazi wengxenye ye Woodlands Farm esabelweni seMatabeleland South uziqhenya ngomhlabathi lo kanye lenkomo zakhe ezingamatshumi ayisitshiyangalo mbili lanhlanu – 85.
Ulenkunzi, amathokazi lamathole okubiza imali enengi okumangalisayo.
Uthi lesi sasiyisifiso ayelaso kusukela ngesikhathi esekolotshini le University of Zimbabwe engakaphutshi izifundo zakhe ngomnyaka ka2004.
UNyathi owathola ipulazi leli ngaphansi kohlelo lokwabiwa kwamapulazi abamhlophe, ungumqeqetshi ekolotshini leLupane State University. Ucabanga ukuthi umuntu kumele athakazelele ezamabhizimisi esesekolitshini.
Uqhubeka esithi yena waqogelela imali okweminyaka eminengi ukuze asungule ibhizimusi lakhe leli.
Lokhu kugcizelelwa ngezinye izifundi zemakolitshini lazo ezikhala ngokuswelakala kwemali yokusungula amankampani loba nje besithi izifundo ziyabe zibapheke kahle emakolitshini.
UMnu. Isaac Mpofu owayengumsekeli kanobhala jikelele kuhlangothi lukahulumende lwezemfundo ephansi, uthi kumele kubuyiselwe izifundo zakudala ezeF1 le F2.
Izifundo zeF1 zazilungiselwe abakhaliphileyo engqondweni kwezemfundo kuthi ezeF2 zingezabaphiwe ezandleni. Njengomuntu owayengumphathisikolo seMzinyathini Secondary School esabelweni seMatabeleland South esesiyi F2, uMpofu ukhuthaza uhulumende ukuthi abuyisele imfundo yeF1 leF2.
Kumnayaka odlulileyo, uhulumende wabumba uhlangothi olubona ngezemfundo olwePsychomotor okumele lukhangelane lemfundo yef1 leF2. Kulabakhokheli beZimbabwe abanengi abafunda ezikolo zeF2. Bagoqela abake basekela umongameli welizwe abahlanganisela uMnu. Joshua Nkomo, uMnu, Joseph Msika loMnu. Simon Muzenda asebatshonayo.
Akwaziwa yukuthi uhlelo lweF1 leF2 luzavuselela yini izifundo zelizwe leZimbabwe.