Kuhlelo lwamasiko lokuphila kwabantu nsukuzonke, ngoLwesibili sixoxe ngomgubho wenkosi yaMaNdebele uMzilikazi kaMatshobana Khumalo.
Kukhanya selidumela emansumpeni ukuthi kubekwe inkosi kulandela ukunyamalala kukaLobengula owaba yinkosi yaMaNdebele yokucina.
Indlu yesikhosini yethule umbiko ngempelaviki kusenziwa isikhumbuzo sikaMzilikazi ukuthi isiphendlekile indlela yokudinga inkosi kaMthwakazi.
Loba kunjalo, bakhona abanye abantu abathi ingavuselelwa indlu yenkosi ilakho ukungqikilana lababusayo eZimbabwe njengoba kungela nkunzi ezingahlala esibayeni esisodwa. Kambe kozala nkomoni?
Ukuze sihlaziye udaba lolu sixoxe loMnu. Thabani Khumalo ingcwethi kwezamasiko esintu loMnu. Dumisani Nkomo ingcwethi kwezombusazwe.
UKhumalo uthe kuliqiniso ukuthi ingabekwa ngesikhathi esifitshane inkosi okungabe phose umnyaka wonke.
Uthe isihlolisisiwe yakhethwa indlu okufanele ukuthi kutholakale khona inkosi. Indlu le ngekaNyamande, umntaka Lobengula owayencedisana lonina uLozikeyi kusukela ngesikhathi inkosi inyamalala.
UNkomo uthe kaboni ukuthi kuzaba lokuxokozela phakathi kwendlu yenkosi labaphathintambo belizwe ngemgqondo eyehlukeneyo yokukhangelane lokubusa uzulu.