Umlimi weFigtree, uMnu. David Conolly, uthi uxotshiwe lamuhla epulazini lakhe ele Centenary Farm esabelweni seMatabeleland South ngumsekeli kanobhala ewofisi kaMongameli Robert Mugabe.
UConolly, ohlaselwe yizithunywa zikaMnu. Ray Ndlukula kusukela ngoMvulo, uthi usehambisa udaba lolu edale lomthethwandaba olwe High Court koBulawayo.
Uthi izithunywa zikaNdlukula zivale indawo yonke epulazini lakhe zaxotsha lezisebenzi ezifika amatshumi amabili lane – 24.
UConolly usecela ukuthi idale lomthethwandaba ligcizelele isinqumo elasithatha lonyaka sokuthi akumelanga uNdlukula ahluphane laye epulazini leli.
Uthi ukhulumisane leziphathamandla zamapholisa lamuhla ezimtshele ukuthi akulanto ezingayenza nxa uNdlukula efuna ukuthatha ipulazi lakhe njengoba esewofisini kamongameli.
Ibandla leZanu PF lasungula uhlelo lokuthathela abamhlophe amapulazi ngomnyaka ka2000 okwatshiya inengi labo lingelamapulazi.
Bakhona abakhonona ngokuthi abalimi abathatha amapulazi la kabenelisi ukwenza umsebenzi okumele bawenze ngemfanelo.
Kukhanya engani uNdlukula usezimisele ukuthatha ipulazi le Centenary elafakwa ezandleni zikazulu nguhulumende ngomnyaka ka2003.
UNdlukula, owaphiwa incwadi nguhulumende ngoNhlolanja lonyaka ezimnika amandla okuthatha ipulazi leli, kafunanga ukukhuluma okunengi ngodaba lolu.