Abesifazane ezansi yeMaNdebeleni bathi lokhu bebandlulwa ngobulili ngoba abesilisa bethola amathuba angcono okuzithuthukisa kulabo.
Lokhu kwethulwe ngabantu ngesikhathi kunanzwe usulu lweInternational Women’s Day ngeSonto.
Loba lelilanga linanzwa minyaka yonke, abesifazana bathi uhlelo lokulinganiswa kwamathuba abesilisa labesifazane luhamba ngesiqubu sofudu njalo kuyadingeka ukuthi uhulumende asebenzelane lenhlanganiso ezizimeleyo ukuze kuphele ukuncindezelwa kwabesifazane.
UNkosikazi Janet Nkala, isakhamuzi seMatshetsheni, uthi loba ethakazelela usuku lolu minyaka yonke, akulanguquko ayibonayo ngoba inengi labomama, ikakhulu emaphandleni, lithwele nzima.
“Lelilanga okuthiwa ngelabomama labekwa kuphela kwathiwa ngelabomama. Umama usebenza nzima umama unakekela imuli edingela abantwana ukudla, lilanga kuphela elabekwayo babezama ukuthi basithuthukisa mhlawumbe ngumbono womunye umama eyokuthi sikhululeke lathi asikhululwanga umuntu ongumama uthwele nzima.”
UNkosikazi Phathisiwe Dube, umfundisi kubandla leChrist Tarbenacle Ministries, uthi lasesontweni lukhona ngakho kuyadingeka ukuthi kubelemfundiso kubomama ukuthi baphatheke kundaba zobukhokheli.
Lokhu kugcizelelwe nguNkosikazi Sibonile Magwala, ophatheke kwezokwenjiwa kwegolide, othi ngempela abesifazana bafuna imfundiso.
“Ukuze kubengcono yikuthi sithole imfundiso omama bafundiswe bakhuthazwe kodwa ichallenge ekhona yikuthi omama abala that confidence yokuthi umuntu abele confidence ukuthi aqede ulutho lwakhe luze luyefika ekucineni.”
Loba inengi labesifazana lingakafiki kuzinga eliphezulu, uNkosikazi Qiniso Khabo olilunga leWomen’s Coalition of Zimbabwe, uthi imizamo eyenziwa nguhulumende weZimbabwe iyancomeka.
UMnu Wellington Nare, isakhamuzi seGwanda, uthi omama labo kungumthwalo wabo ukuphakamisana bona ngokwabo ukuze balwisane lokuncindezelwa ngabesilisa bemanyene.
“Kulilanga lokuthi omama bathathelwe inyathelo lokunanzelela lapho abavela khona, amagoals abakhangeleli ukufika khona engiku encourager omama yikuthi isikhathi sokuthi basukume beyond ukuncindezelana sokuyisikhathi sokuthi baphakamisane omama lolalowo umama abelilele lokuthi omunye umama aphakame ukwenzela ukuthi benze imithetho ezasukumisa bonke njengabomama jikelele.”
Suku lweInternational Women’s Day lunanzwa minyaka yonke mhla ziyisitshiyangalombili kunyanga kaMbimbitho.
Kwamanye amazwe, lelilanga lidlula njengawowonke, kuthi kwezinye indawo liba likhefu kukanti abanye omama bangena ezitaladeni betshaya itoyi toyi bekhonona ngokuncindezelwa ngabesilisa ngalolusuku.
Lonyaka lunanzwa phansi kwendingimba ethi #Each forEqual okutsho ukuthi ngubani lobani ulomlandu wokulwisana lokuncindezelwa kwabesifazane.
Your browser doesn’t support HTML5
Abesifazane Bakhathazekile Ngokungathuthukiswa Ngemfanelo