Amazwe amanengi akhangelelwe ukunanza ilanga lokulondolozwa kwenyamazana zasendle eleWorld Wildlife Day. Ilanga leli libuya ngesikhathi ezinye inhlanganiso ezizimeleyo zikhala ngokuthi eleZimbabwe lifuna ukuthengisela amanye amazwe indlovu eziphilayo.
Inhlanganiso ezikhonona ngalokhu zigoqela iWorld Animal Protection, i-African Wildlife Foundation lezinye ezitshiyeneyo.
Omunye wabaqondisi beAfrican Wildlife Foundation, uMnu. Jimmiel Mandima, uthi okwenziwa yiZimbabwe kwenza kubenzima ukuthi balwisane lokuthengiswa kwezitho zenyamazana zendle okungekho emthethweni ezinjophondo lukabhejane.
UMandima uthi bahlangana lezinye inhlanganiso kusasa eWashington DC khonapha eMelika ukuhlaziya ngendlela zokulwisana lokuthengiswa kwezitho lezi kwamanye amazwe.
Uthi akumelanga eleZimbabwe ligxile kakhulu ekuthengiseni inyamazana eziphilayo kodwa lithuthukise ubudlelwano balo lenhlanganiso ezizimeleyo ukuze lithole inzuzo ephezulu nxa kuthengiswa okuhambelana lenyamazana zasendle.
UMnu. Siphambaniso Moyo ohlala eVictoria Falls, lapho asebenzelana lezethekeli ezivela kwamanye amazwe ezithanda ukuya endaweni ezinjenge Hwange National Park, uthi kumele inyamazana lezi zigcinwe ngonanzelelo.