Ingcwethi kwezempilakahle ziveza ukuba umhlobo wegciwane elibangela umkhuhlane weCOVID-19 elitholakala eZimbabwe liyafanana lelilolaka elitholakala kwele South Africa ngakho-ke uzulu kumele azivikele kilo ngokuyahlatshwa amajekiseni okulwisana leCoronavirus.
Lokhu kuvezwe ngenye ingcwethi kwezempilakahle, uDokotela Tinashe Gede, otshele intathelizindaba eHarare, ukuthi kusanda akwenziwa uphenyo oluveza isimo somkhuhlane weCOVID-19 eZimbabwe.
“Lapha eZimbabwe sithole usizo lwemali ngoZibandlela yokuqhuba inhlolisiso le, evelele kwabe UK Medical Reserach Council, senza leyonhlolisiso kubantu abedlula inkulungwane, sathola ukuba isilinganiso phose sokungamatshumi ayisitshiyagalolunye - (about 90% of the cases) abatholakala belegciwane kuleli kwakungelohlobo lwase South Africa. Lokhu kusitsho ukuba ubhubhane lweCOVID-19 olutholakala kuleli ngolohlobo oluvelela kwele South Africa.”
UDokotela Tinashe Gede. (Photo:VOA)
UDokotela Gede ukhuthaze abantu ukuba bahlatshwe amajekiseni okuzivikela kumkhuhlane weCOVID-19.
UProffesor Elopy Sibanda, umnikazi weGAMMA Medical Laboratories, ugcizelela ngokuqhakatheka kokuhlatshwa ijekiseni yeCovid 19 ekumelaneni laleli gciwane.
“Isixwayiso sami ngesokuthi dinga ivaccine, hlatshwa nxa ixetsha lakho selifikile, lingavele lifike ixesha lakho, hlatshwa ungayekeli ngoba umkhuhlane lo uyabulala. Ithuba esilalo lona leli yikuthi khathesi kulethuba lokuthi umuntu ahlatshwe ivaccine. Kasilisebenzise kuhle ukwenzela ukuthi singabi lohlupho lokuthi siyabuya sigijime futhi sidinga ama-oxygen, sigcwalisa izibhedlela.”
Uhulumende yena uthi wenza konke okusemandleni akhe ukuvikela uzulu kulolubhubhane ngokumkhuthaza ukuba ahlatshwe ijekiseni leli elisiza ekwehliseni amathuba wokuguliswa okwedlulise amalawulo lapho umuntu ethe wahlaselwa ngoba evikelekile.
Embikweni awethulele intathelizindaba lozulu ngemva komhlangano wequla labaphathintambo umphathintambo wogatsha lwezokukhitshwa kwemibiko uNkosikazi Monica Mutsvangwa uthi uhulumende uyaqhubeka ngemikhankaso ilizwe lonke yokupha abantu imfundiso ngejekiseni yokuzivikela eyeVaccine.
“Iqula labaphathintambo laziswe ukuba sekuqakathekiswa ukuhlatswa kwamajekiseni okuzivikela kulabo abahlala emadolobheni akumingcele njalo lumsebenzi uqhuba kuhle.”
Kodwa abasebenzisana lozulu abagoqela abenhlanganiso yeCommunity Youth Development Trust edolobheni leGwanda bathi bakhathazekile ngokube lokhe isilela impahla yokuzivikela yama Personal Protective Equipment - PPE kulabo abasebenzisana lozulu abanjengalabo abasenza ezibhedlela, amapholisa, abalondoloza izibotshwa labanye.
Obona ngezokukhulumisana lozulu kuCYDT, uNkosazana Bongiwe Dube uthi kawatholakali amaPPEs okuvikela izisebenzi labanye abantu.
“Lokhe kungela amaPPE’s for amaEssential workers. Ungakhangela amapholisa, ukhangele oGuard benkambeni bayabe bengelawo ama PPE’s, sesikhangelela izigqoko zonezo kumele bezigqoke, sikhangele ama mask, sikhangela ama sanitisers, bayabe bengalazo zonezo zonke lezi izinto. Laloba ufika enkambeni, ziyashota becine sebesenza lezi ezokuziphekela ikanti ke kumele ukuthi ngabe kufika lesi isikhathi bayazinikwa yiGovernment.”
Ngokutshona kwelanga layizolo ngolweSithathu mhla ka 21 Mabasa abazempilakahle babike ukuba abafika phose inkulungwane eziyisithupha lengxenye – 7,402 behlatshwe ijekiseni yokuzivikela kumkhuhlane weCOVID-19 okwakuqala, okutsho ukuba sebefika phose amakhulu amathathu enkulungwane – 295,631 asebehlatshiwe lelijekiseni okwakuqala kuze kube khathesi. Kuthi abafika phose amakhulu ayisithupha - 587 kungasebephinda ukulihlatshwa njangalokho okutshiwo ngabezempilakahle kusitsho ukuba sebefinyelela kunkulungwane ezingamatshumi amane – 37,365 asebeliphindwa.
Baveze njalo ukuba ndawonye eleZimbabwe selilabantu abafika phose inkulungwane ezine - 37,980 abatholakale belomkhuhalne weCOVID-19 selokhu waqhamukayo nyakenye abedlula kancinyane inkulungwane ezingamatshumi amathathu lanhlanu – 35,065 babo kungasebasinda kiwo, abedlula kancinyane inkulungwane elengxenye bakhona - 1,555 balahlekelwa yimiphefumulo.