Abenhlanganiso emela imisakazo yezabelo eye Zimbabwe Association of Community Radio Stations (ZACRAS) bamukele ngenjabulo isinqumo sokuphiwa imvumo yokusakaza kwemisakazo yezigaba eyisificaminwemibili-8, besithi lokhu kuveza ukuthuthuka komsebenzi wokuthukululwa kwamagagasi lokuvuleka kwamathuba okuvulwa kwemisakazo eminengi eZimbabwe.
Uhulumende weZimbabwe wethule isaziso zokunikezwa amalayisensi amaradio, kwemisakazo yezigaba eziyisithupha egoqela owe Radio Bukalanga.
Uhlangothi olulawula ezokusakaza, olwe Broadcasting Authority of Zimbabwe lwazise ukuthi eminye imisakazo esizaqala ukusebenza ngethi Matobo Community Radio Trust, Chimanimani Community Radio Station, Vemuganga Community Radio Trust eye Chipinge, Ndau Radio Trust, Twasumpuka Radio Trust eye Binga, Kasambabezi FM eye Kariba leMadziwa Community Radio Trust eyeShamva.
Lokhu kutsho ukuba imisakazo esiphiwe imvumo yokusebenza isifika kwelitshumi lane -14 ngemva kokunikezwa kweminye imisakazo amalayisensi la, nyakenye.
Umphathi womsebenzi kunhlanganiso eyeZACRAS, uMnu Jerry Zingwevu, uthi njengenhlanganiso bayajabula ngethuba abaliphiwe nguhulumende ukuba imisakazo le iqale ukusebenza.
“Uhlelo lolu olwenziwe ngu hulumende ukuba kuphiwe isiceco sokusakaza, siyalwamukela kakhulu nngoba indawo ekade zicatshile emaphandleni ezifna labo Binga, bezisehluleka ukufinyelela ukuhambisa imibiko.”
Uqhubeke esithi uhambo lokuthola amalayisensi belungekho lula esithi izigaba ezitshiyeneyo kwele Zimbabwe kumele zithole limisakazo ukuze abantu balezo zabelo babe lendawo lapho abangakhuluma lokucebisana ngabadibana lakho empilweni kulowo mango.
“Imisakazo leyi yinsika yokuthuthukiswa kwezigaba. Sithi uhulumende ngabe uyaqhubeka ekhangela indawo ezifana labo Tsholotsho. Sifisa ukusebenza lohulumende ukuze uhlelo lolu luqhubeke.”
Umgcinisihlalo we khomithi yedale lephalamende ebona ngezokusazaka, uNkosikazi Sipho Ndlovu Mokone, uthi loba nje kuthokozisisa ukuba imisakazo isithole amalayisensi kuzamele uhulumende asekele lumsebenzi ngemali.
“Sithi thina iBAZ kayizame ukunceda ama radio lawa ukuba aqalise umsebenzi. Lawana awaphiwa amalayisensi kunje kawaqali ukusebenza. Sicela ukuba bancedwe ukuze baqale umsebenzi.”
Umgcinisihlalo womsakazo weBayethe Fm eye Matobo, uMnu Zenzo Ncube, wona ongomunye wabathole imvumo, uthi bazazama ukuba uzulu weMatobo athole ithuba lokutsho inhlupho zakhe kulumsakazo.
“IMatobo community radio trust sithabe kakhlu ukuba sithole imvumo yokuba sesizasakaza. Sijabule kakhulu ukuba sesithole imvumo yokusakaza esigabeni se Matobo ehlanganisa iMaphisa, iBrunabag kanye le Mangwe.”
Uqhubeke ethi lumsebenzi mkhulu ngakhoke badinga ukuthi uzulu wonke walumango abambisane kusetshenzwe ndawonye.
“Uncedo esiludingayo lunengi. Kunzima ukuba ngikutshele ukthi lungakanani. Imithetho ye radio leyi ithi akumelanga sithole usizo phandle kwelizwe.”
Sekuyiminyaka ethile inhlanganiso ye ZACRAS ikhankasela ukuphiwa kwemisakazo yezigaba imvumo yokusebenza okusemthethweni kwele Zimbabwe.
Inhlanganiso le income uhulumende ngakwenzileyo lokhu isithi kusobala ukuba amagagasi kwele Zimbabwe asevuleka kodwa ixwayisa uhulumende ukuthi engangeneli ekufakeleni limisakazo imigoqo yokuvimba abantu ukuthi bakhulume imibono yabo bekhululekile.
IZACRAS ithi imisakazo leyi izakwenza ukuba uzulu weZimbabwe enelise ukuthola ulwazi kwezentuthuko yomnotho kanye lokwenzakala kwezombusazwe.
Ngakhoke uzulu, osomabhizimusi lohulumende bakhuthazwa ukuthi basekele lumsebenzi ngosizo lwemali yokuqala umsebenzi ngoba inengi lawo engela mali.