Sokuleminyaka phose engamatshumi amahlanu kwabhubha izisebenzi ezedlula amakhulu amane eHwange Colliery, okwaziwa ngokuthi yiKamandama Disaster.
Lokhu kwenzakala mhlaka 6 kuNhlangula 1972 emgodini okuthi yiNumber 2.
Iziphathamandla zomgodi lo zabika ukuba kwadubuka imethane gas lokunye okutshisayo okwabulala lezinye izisebenzi ezaziseduzane lomgodi lo.
Ababhubha engozini le bangamakhulu amane lamatshumi amabili lasikhombisa – 427.
Abafelwa yizihlobo bathi sebehlupheke okweminyaka eminengi ngenxa yokuthi inkampani le kayizange ibancede ngedlela okwakungenza ukuba baziphilise.
Omunye wabahluphekayo nguNkosikazi Agnes Shava, ohlala eJambezi, esabelweni seMatabeleland North. Umnyeni wakhe, uMnu. Amos Sijara, waphelela emgodini.
UMnu. Daniel Molokele, omele iHwange Central edale lephalamende, uthi udaba lolu kumele luhlolisiswe yinkampani yeHwange Colliery.
UNkosazana Simiso Mlevu, isikhulumeli senhlanganiso yeCenter for Natural Resource Governance, uthi kuqakathekile ukuvikela abemba okutshiyeneyo.
UNkosazana Ndlovu uthi banengi ababhekane lohlupho lukudilikelwa yimigodi eZimbabwe.
Kasenelisanga ukukhuluma leziphathamandla zenkampani yeHwange Colliery ngodaba lolu ngoba bezingaphenduli omakhalekhukhwini babo.