Izakhamizi zedolobho leGwanda sezikhuthaze uhulumende ukuthi amise inkampani kaMnu. Wicknell Chivayo eye Intratek, okumele isungule umsebenzi wokutholisa idolobho leGwanda amandla kagetsi awelanga kumbe isolar, ngoba kayiqhubi ngemfanelo lumsebenzi.
Akulamsebenzi owenziwayo okwamanje endaweni lapho okumele kufakwe khona ama solar panels.
Inkampani yeIntratek yalobelana isivumelwano lenkampani yamagetsi eye Zimbabwe Power Company iZimbabwe Power Company ngomnyaka ka 2015 ukuze ifake amapanel awe solar asebenzisa amandla elanga edolobheni le Gwanda.
Inkampani le yabhadalwa izigidi ezimbili zamadola - $2 million - ukuze ihlolisise ukuthi ingaqhuba njani lumsebenzi yaphinda yabhadalwa izigidi ezinhlanu zamadola - $5 million - ukuthi ilungise imigwaqo njalo incente indawo engama hectare angamakhulu amabili lapho obekuzafakwa khona isithitshi samasolar panel.
Abantu badinga inkuni endaweni lapho okumele kufakwe khona umlilo kagetsi ophehlwa lilanga.
Kodwa kuze kube lalamhlanje lumsebenzi awukapheli. Bekumele ugqitshwe ngenyanga eyedlulileyo.
Umsakazo weStudio 7 owethekelele leyondawo uthole kungasetshenzwa njalo ingxenye yeganga lokhe ingakancenthwa. Isiphiphithi esikhona kulindawo ngesabantu abatheza inkuni kuphela osekudale ukuthi izakhamizi zalelidolobho zithi sokufanele iZPC iyesule isivumelwano eyasibhalelana lenkampani kaChivayo eyeIntratek.
UMnu. Bekezela Maduma Fuzwayo, unobhala jikelele wenhlanganiso yezakhamizi zedolobho leGwanda, uthi sokuyisikhathi sokuthi lesisivumelwano siyesulwe kudingwa abanye abazaqhuba lumsebenzi.
Kulocingo lolu endaweni okusebenza khona inkampani yeIntratek kaMnu. Wicknell Chivayo.
Amazwi akhe agcizelelwe nguNkosazana Julieth Nkiwane othe kukhona okunuka santungwane.
Lokhu kugcizelelwe nguMsizi Gumbo othi njengezakhamizi zalelidolobho bazibona beqiliwe.
Osakhulayo uMthandazo Sibanda uthi sokumele uhulumende adinge abanye abazaqhuba lumsebenzi ngesikhathi.
Umgwaqo ocentwe yinkampani kaMnu. Wicknell Chivayo.
Iziphathamandla zeIntratek esigodlweni eHarare azithandanga ukukhuluma ngaloludaba zisithi sixoxe labe ZPC bona esingenelisanga ukuxoxisana labo.
UMnu. Chivayo waduma eminyakeni eyedlulileyo njalo ebesaziwa kakhulu ngokuthanda ukuzibonakalisa enkundleni yebulenjini yeFacebook endiza loba ethwele inqwaba yemali kumbe etshengisa impahla yakhe ebalisa izimota lezicathulo.
Your browser doesn’t support HTML5
Kutshaya Umoya Lapho Okumele Inkampani kaWicknell Chivayo Iphehle Umlilo Kagetsi