Uhulumende weZimbabwe usevimbe ukusetshenziswa kwemali kumakhalekhukhwini njalo wavala lomkambo wokuthenga lokuthengisa imali oweStock Exchange.
Uhlangothi lukahulumende olubona ngokwethulwa kwemibiko luthi lokhu kwenzelwe ukuba kumiswe amankampani amemethekisa umkambo wensitha owokuthenga lokuthengisa imali.
Luthi ukumiswa kokusetshenziswa komkambo wemali oweEcocash kwenziwe ngenxa yokuthi kukhanya engani yiwo oqhuba umkambo wemali wensitha sonke isikhathi.
Uhlangothi lolu luthi kuzavalwa imikambo le kuze kulungiswe ukuthenga lokuthengisa imali.
Luthi umkambo weZimbabwe Stock Exchange kukhanya udlelana leminye imikambo yemali okwenza ukuthi kwehlukane okumangalisayo ukuthenga lokuthengisa imali eZimbabwe.
Uhulumende uthi kuyaziwa ukuthi okwamanje kulemikambo yemali ebalisa oweEcocash, Old Mutual Impled Exchange Rate, MyCash, Telecash, OneMoney, ovunyelwa libhanga leReserve Bank leyinye.
“Kusobala ukuthi iEcocash yiyo ekhwezela umkambo wensitha. Ngakho-ke sibona kungcono ukuthi sikuvimbe lokhu. Sizazama ukunceda labo abazabhekana lohlupho phezu kokuvinjwa kwemikambo le.”
Uhulumende uthi kulezinye inkampani esezingene kubhizimusi lokuthenga lokuthengisa imali lobanje zingelawo amacence okwenza lokhu.
Uphinde wathi amanye amankampani la afihla imali ngendlela okunzima ukuyithola nxa kuphenywa ingwalo zabo zemali.