Owayengusibalukhulu webhanga leReserve Bank of Zimbabwe uthi iziphathamandla zikahulumende, abahluli bomthethwandaba abambalwa, abakhokhela amabandla ezokholo lweSiKhristu, amalunga edale leCabinet lephalamende kanye labalandeli bebandla leZanu PF abanikwa amakhuba lokunye okokulima kwakungamelanga bahlawulele abakuphiwa kuhlelo olwaqhutshwa libhanga leli kusukela ngomnyaka ka2006 kusiyafika umnyaka ka2008.
Kwasetshenziswa imali efika izigidi ezingamakhulu amabili zamadola eMelika - $200 million kuhlelo lolu olwalubizwa ngokuthi yiFarm Mechanisation Program.
UMnu. Gideon Gono utshele iphephandaba leSunday Mail ukuthi abanikwa amakhuba, amacombine harvestors lokunye, abagoqela uMongameli Emmerson Mnangagwa, owayengumongameli umuyi uRobert Mugabe labanye babo, babengaphansi kohlelo lokulima kulandelwa ukuthathelwa kwabamhlophe amapulazi nguhulumende esekelwa ngabalwa impi yenkululeko.
UMnu. Alex Magaisa, ofundisa kwele Bhilithane, izolo wethulele uzulu amagama abantu amanengi abathola impahla etshiyeneyo kuhlelo olwaluqhutshwa libhange leRBZ. Idale lephalamende lake lazama ukucubungula udaba lolu kodwa uhulumende wala ukuveza amagama abantu abathola impahla yokulima.
Kasenelisanga ukukhuluma loGono, isikhulumeli sikaMnangagwa labanye okuthiwa bathola okutshiyeneyo kuhlelo lweFarm Mechanization.