Kuhlelo lwezizalwane zeZimbabwe ezihlala emazweni, ngoLwesithathu sixoxe lesizalwane seZimbabwe esizama ukudinga amaphepha okuphephela eBhilithane.
UNkosazana Ester Nyambi wahamba kwele Bhilithane ngomnyaka ka2009 esiyakwenza izifundo zakhe zeMasters Degree.
Uthe eqeda lezo zifundo wacela-ke ukuba yisiphepheli esesaba ukuthi ayekulobe kugwalo lwakhe lokuqedisa izifundo zakhe, idissertation, luzacaphula uhulumende.
Waveza kugwalo lwakhe lolu ukuthi amakolitshi amanengi eZimbabwe ahlutshwa nguhulumende osebenzisa kubi imali kazulu.
Wacina esedinga ukuba yisiphepheli eBhilithane lapho asephila khona nzima njengoba engenelisi ukuzisebenzela.
"Lapha kuyahlupha ungaba yisiphepheli ngenxa yokuthi ucina ungavunyelwa ukuthi usebenze njalo lokuthi odinge imali ngendlela yokuzenzela. Ngiphiwa i36 pounds ngeviki yokuthenga konke okufunakala endlini.
"Umntanami laye uphiwa imali efanayo okumele sithenge konke akufunayo. Kunzima ukusebenzisa imali encane kangaka yikho-ke lokhu ukucina kusenza abanye ukuthi badinge ukudla okuholiswa nguhulumende."
Kulezizalwane zeZimbabwe ezinengi okwamagama ezihlala emazweni kulandela ukubalekela ukuhlukuluzwa ngabezombangazwe lokugugudeka komnotho.
Your browser doesn’t support HTML5
Ingxoxo Esiyenze LoNkosazana Ester Nyambi Ohlala eBhilithane