UMongameli Emmerson Mnangagwa uthi alikho ibandla lezombusazwe elizweni elingatshela ikhomishini ebona ngezokhetho eye Zimbabwe Electoral Commission (ZEC) ukuthi isebenze njani.
UMnangagwa utsho lokhu emhlanganweni wokudinga usekelo lwamavoti owenzelwe eMutare Aerodrome edolobheni leMutare.
Uthe kuyisimanga ukuthi uMnu.Nelson Chamisa, umkhokheli womanyano weMDC Alliance, nguye osekhokhela ukuthuka iZEC yena kungomunye wabaphatheka ekukhethweni kwamalunga ale ikhomishini asewathuka lamuhla.
Ingcwethi ebona ngezokucubungula nzombusazwe, uMnu. Tjenesani Ntungakwa, upha umbono wakhe ngaloludaba.
Omunye wabazancintisa kukhetho lwalonyaka ongumkhokheli welinye lamabandla aphikisayo ele Nationalist Alliance of Patriotic and Democratic Republic, uMnu. Devine Mhambi Hove, uthi udubo olukhulu olukhona yiwo amabandla azibona eyiwona amakhulu ukwedlula amanye njalo engafuni ukuphatheka emizameni yokulungisisa inkinga ezikhona elizweni ngokuphathelane lokhetho.
Inkulumo kaMnangagwa ibikwa engani iphendula okuhlezi kukhalazwa ngabamabandla aphikisayo akumanyano weMDC Alliance njalo iza ngemva kokuba sebekubeka sobala ukuba kalusoke lwenziwa ukhetho nxa lokho abangakho kungasalungisiswanga.
Lokhu ngokubalisa udaba lokudindwa kwamaphepha okuvotela ama ballot papers, ukuba ngubani owanikezwa lowomsebenzi wokulidinda njalo lokuthi kumele kube logwalo lokuvota olungela mabizo abantu ababhubhayo labantu bokuzibumbela.
Kodwa u Mnangagwa uthi okwenziwa yiZEC kusemthethweni.