Osomabhizimusi beZimbabwe babambisana lohulumende kaMongameli Emmerson Mnangagwa ekuvuseleleni umnotho welizwe ogugudeke okwethusayo.
Lokhu kuphume emhlanganweni wokuhlolisisa okwenzakala kwele Zimbabwe obuqoqwe yikhomithi yedale leSenate eMelika ebona ngokwenzakala kuzwekazi leAfrica lezempilakahle eyeSubcommittee on Africa and Global Health Policy.
Owethule lokhu nguMnu. Joe Mutizwa, umqondisi weJSM Strategic Pathways, obemele osomabhizimusi abakunhlanganiso yeZimbabwe Stock Exchange Listed Companies Forum.
Uthe abantu abanengi bafisa ukuthi ilizwe leZimbabwe lithuthuke ngesiphangiphangi.
Uphinde wathi kunengi okwenziwa nguhulumende kaMnangagwa okuzanceda ilizwe.
Kodwa uMnu. Matthew Harrington, umsekeli womqondisi wohlangothi lukahulumende olubona ngokudlelana lezwekazi leAfrica, uthi umthetho owethulelwa ilizwe leZimbabwe yiwo ozakwenza kubelengqubela phambili eZimbabwe.
Amabandla aphikisayo athi ibandla leZanu PF kalifuni ukusebenza lamanye ukwenzela ukuthi kuthuthukiswe ilizwe. UNkosazana Thabitha Khumalo, uthi kumele ibandla leZanu PF lime kancane ukukhuluma ngezijeziso zenotho ukwenzela ukuthi likhulumisane laphikisayo.
Obephethe udaba lweZimbabwe emhlanganweni owenzelwe eMelika izolo nguMnu. Jeff Flake osezatshiya isikhundla sommeli weArizona kudale leSenate.
Your browser doesn’t support HTML5
Udaba Esilethulelwe NguGibbs Dube