UMongameli Emmerson Mnangagwa uthi sobuguqukile ubudlelwano belizwe leZimbabwe lele Bhilithani lobanje kungakakhanyi ukuthi eleMelika limi ngaphi kwezombusazwe kulandela iminyaka eminengi amazwe la engadlelani ngamfanelo.
UMnangagwa utshele izizalwane zeZimbabwe ezihlala eMelika emhlanganweni owenzelwe eNew York ngeSonto ukuthi uyajabula ngendlela ilizwe leBhilithani eselidlelana ngayo lelizwe leZimbabwe.
“Kunengi okwenzakala nxa kulabesifazana embusweni kwele Bhilithani. Kwathi kulo Nkosikazi Margeret Thatcher ngesikhathi impi yenkululeko isitshisa, wenza ukuthi kubelokukhulumisana lesasilwisana labo. Khathesi sokulo Nkosikazi May ofisa ukudlelana lathi kahle. Kodwa-ke kwangena amadoda embusweni kwaphambaniseka ubudlelwano bethu … Ngathi ngisanda kugcotshwa ukuba ngumongameli ngemukela ucingo oluvela kumphathintambo wakwele Bhilithani uTheresa May owathi sikhulume konke esifisa ukuthi kwenziwe lilizwe leBhilithani. Ngathi kame okwenyanga ngike ngilungise uhulumende wami.
“Kuthe kufika isikhathi leso, wangitshayela ucingo sakhuluma ngakho konke esikufisayo. Wathuma umuntu njalo ukuthi azekhulumisana lathi. Sathokoza sibili ngalokhu okutshengisa ukuthi sokulobudlelwano obuphezulu phakathi kwelizwe leZimbabwe lele Bhilithani.”
Kodwa-ke uMnangagwa uthi akukacaci kangako okwenziwa lilizwe leMelika.
“Ilizwe leMelika ukungani asikuboni kahle lapha. Kusese kude phambili. Kwake kwabuya amalunga edale leCongress abhala ugwalo olujulileyo olwasichothoza okumangalisayo. Kodwa bathi bebuya okwesibili kwaba ngconywana. Ubudlelwano bethu kabunjengalokhu okwakukhona singakangeni embusweni. Silethemba lokuthi ubudlelwano lobu buzakuba ngcono ngokuya kwesikhathi.”
Uthe wathi lelizwe leGermany lalo lifisa ukuvuselela ubudlelwano lelizwe lakhe.
“Siyabona ukuthi uNkosikazi Engel Mekel laye ulesifiso sokudlelana ngendlela ephuzulu lathi. Usanda kuthuma isiphathamandla sikahulumende ukuthi sizekhuluma lathi ngokudlelana kwezokuthuthukisa umnotho welizwe leZimbabwe.”
Uphinde wathi akumelanga abantu besabe ubudlelwano belizwe leZimbabwe leleChina njengalokho okwesatshwa ngabantu kwele Zambia lapho abathi ilizwe selithengisiwe.
“Ngiyalizwa elikutshoyo ngokwesaba elilakho. Ngisanda kuthola imali engamabhiliyoni amabili lengxenye kwele China yokuvuselela inkampani yeHwange Colliery. Sesiyitholile imali le njalo sesiyisebenzisa. Sikhangelele ukuthi sizathola umlilo kagetsi othe xaxa esizawusebenzisa kwele Zimbabwe.
“Kasisoze sisebenzise imali kahulumende ukuthi sihlawule isikwelede lesi ngoba umlilo kagetsi lo uzabe usenzela imali. Ngakho-ke kangiboni inkinga yokuthi abantu besabe ngenxa yokuthi uhlelo lokuvuselela inkampani le luzabe lusenzela imali yokubhadala isikwelede.”
UMnangagwa uthe kulolunye njalo uhlelo lokuphehla umlilo kagetsi olwenziwa eKariba ngemali eyathathwa kwele China.
“Uhlelo lolu ngolwe Kariba South Extension lapho esiphehla khona njalo umlilo kagetsi. Okwamanje siyabhadala isikwelede sakwele China ngoba silomlilo kagetsi esiwuphehlayo kuleyo ndawo. Okuhle yikuthi kasithengi umlilo lo kwele South Africa. Siyazenzela. Siyabona ukuthi lungaphela uhlelo lolu sizasala silakho esikubambileyo okokuphehlisa umlilo kagetsi. Ngakho-ke lingethuki ngokuthi sizathengisa ilizwe. Ngiyalalela okumangalisayo. Lingitshele nxa ngiphambanisa.”
UMnangagwa uthe kumele abantu beZimbabwe abahlala kwamanye amazwe bazame ngamandla wonke ukuthi bathuthukise ilizwe labo.
“Sesifikile isikhathi sokuthi lisebenzele ilizwe lenu. Selilolwazi olumangalisayo elingalusebenzise ukuthi lithuthukise ilizwe leZimbabwe. Kumele likwenze lokhu ngoba yilo phela ilizwe elilifunayo.”
Kodwa-ke uMnu. Den Moyo, okubandla leMDC-T elikhokhelwa ngoNkosazana Thokozani Khupe, uthe kunengi okumele kwenziwe nguhulumende weZimbabwe ukuze bacabange ukuthuthukisa ilizwe labo elibuswa libandla leZanu PF.
UMnangagwa ukhangelelwe ukuthi uzakhuluma emhlanganweni weUnited Nations General Assembly ngoLwesithathu.
Your browser doesn’t support HTML5
Udaba Esilethulelwe NguGibbs Dube