Odokotela namuhla batshengisele emigwaqweni eHarare ngesikhathi besiya edale lephalamende lapho abahambise khona ugwalo olujulileyo olulotshwe ngodokotela abadala abakhala ngokuthunjwa kuka Dokotela Peter Magombeyi, umkhokheli wenhlanganiso yeZimbabwe Hospital Doctors’ Association elabodokotela abatsha.
Abanye odokotela abatshengisele emigwaqweni eHarare ngoLwesine., September 19, 2019.
Odokotela laba bakhangelelwe njalo ukuthi namuhla kusihlwa bazabuthana eParirenyatwa Hospital eHarare kanye lomdeni kaDokotela Magombeyi labakunhlanganiso ezitshiyeneyo bethule okutshiyeneyo ngokuthunjwa kuka dokotela lo.
UDokotela Samson Dean Ndoro, umsekeli kamongameli wenhlanganiso yeZimbabwe Hospital Doctors’ Association, uthi ulethemba lokuthi amalunga edale lephalamende alutholile ugwalo lwabo olujulileyo phezu kokwehluleka ukwenza lokhu izolo kulandela ukuvinjwa kwabo ngamapholisa.
Umthethwandaba namuhla wethule isinqumo sokuthi akumelanga amapholisa aphambanise ukutshengisela kwabodokotela abazondiswe yikuthunjwa komunye wabo.
Odokotela abatshengisela eHarare bekhonona ngokuthunjwa komunye wabo.
UDokotela Ndoro uthi bazaqhubekela phambili betshengisela ezibhedlela ezitshiyeneyo elizweni kusasa njengoba kukhanya engani uhulumende kenzi lutho ngokudinga uDokotela Magombeyi, owathunjwa ngoMgqibelo ngabantu abacatshangelwa ukuthi badlelana lohulumende.
UDokotela Magombeyi ukhokhela odokotela abakhalala umsebenzi besithi kabasenelisi ukuya emsebenzini ngenxa yeholo eliphansi. Udokotela osathuthukayo eZimbabwe okwamanje uhola amatshumi amane amadola eMelika - $40 ngenyanga.