Ibandla leZanu PF selikhethe uMongameli Emmerson Mnangagwa ukuthi abengumongameli lonobhala webandla leli. Lokhu kutsho ukuba nguye osezancintisa kukhetho lokudinga umongameli welizwe, olwenziwa ngomnyaka ozayo emele ibandla leli.
UMnangagwa, okhethwe emhlanganweni webandla leli owe Extra Ordinary Congress owenzelwa eHarare, uzancintisana labakhokheli bamabandla aphikisa elibusayo.
Emhlanganweni weZanu PF Congress
Utshele abantu emhlanganweni lo ukuthi kuzamele kwenziwe ukhetho olubalulekileyo eZimbabwe.
“Njengokumelelwe nguzulu lokulotshwe yisisekelo sombuso welizwe kumele ibandla le Zanu PF lincintisana lamabandla aphikisayo kukhetho olumele lwenziwe ngemfanelo.”
Utshele abalandeli bebandla leli abedlula inkulungwane eziyisikhombisa ukuthi sokumele ukuthi baqalise ukukhankasela ukuvotelwa nguzulu kukhetho oluzayo.
UGeneral Constantino Chiwenga labanye abasemhlanganweni weZanu PF Extra Ordinary Congress osanda kuphela.
UMnangagwa, obekhangelelwe ukukhetha abasekeli bakhe ababili, ubike ukuba usezakwenza lokhu kunsukwana ezilandelayo.
Bekulemibiko ethi ulakho ukukhetha, uqondisi webutho, uGeneral Constantino Guveya Chiwenga ukuba ngomunye wabasekeli bakhe kanye loMnu. Kembo Mohadi, ophethe uhlangothi lukahulumende lwamapholisa ensitha.
Emhlanganweni weZanu PF Congress
Okwamanje usekhethe onobhala bedale lePolitiburo abagoqela uMnu, Patrick Chinamasa, uMnu. Obert Mpofu, uNkosikazi Oppah Muchinguri Kashiri (osengumgcinisihlalo webandla leZanu PF) labanye abafakwe ezikhundleni ezavuleka sokuxotshwe amalunga ecele leGeneration 40.
Owayengumongameli, uMnu. Robert Mugabe, kayanga emhlanganweni lo lomkakhe, uNkosikazi Grace Mugabe, owaxotshwa labanye okwathiwa besebehluthune intambo zombuso ezaziphethwe nguMugabe.
UMnu. Patrick Chinamasa loMnu. Simbarashe Mumbengegwi
Ibutho lancedisana lecele leZanu PF elibizwa ngokuthi yiLacoste ukuthi lisuse uMugabe embusweni ngenkani lobanje lilokhe lisithi kalizange lihluthune intambo zombuso welizwe.
Your browser doesn’t support HTML5
Ingxoxo lentathelizindaba yeStudio 7 uMavis Gama ngomhlangano weZanu PF Congress