Uhulumende wakwele Melika uthi akumelanga uhulumende kaMongameli Emmerson Mnangagwa aqhubekele phambili ebopha abantu abacatshangelwa ukuthi kabamsekeli.
Isigodlo seMelika eZimbabwe sethule umbiko lo ebulenjini bokuxhumana obeTwitter enkundleni yeU.S. Embassy Harare.
“Ukuthwalisa nzima inkokheli zenhlanganiso ezizimele zodwa kululaza ilizwe leZimbabwe lesimo somnotho. Uhulumende weZimbabwe kumele alandele isisekelo sombuso welizwe, ahloniphe ilungelo loluntu alungise ubudlelwano babantu ukwenzela ukuthi wonke umuntu ancedise ukuthuthukisa ilizwe leZimbabwe.”
Isigodlo seMelika sethule lokhu ngesikhathi kubotshwa uMnu. Kwasi Adu-Amankwah, unobhala jikelele wenhlanganiso yeAfrican Regional Organization of the International Trade Union Confederation (ITUC-Africa), kanye loNkosazana Samantha Kureya, owaziwa kuBusstop TV ngegama elithi Gonyeti lomunye wakhe uNkosazana Sharon Chidewu.
Ababili laba bahlawuliswe amatshumi amabili amadola umuntu munye ngamunye, bakhululwa kodwa baphinda babizwa enkambeni yamapholisa. Betheswa icala lokugqoka okungekho emthethweni izembatho zamapholisa.
Kuthi-ke uAdu-Amankwah othethwe ngamapholisa ewoteleni eHarare wahanjiswa ngenkani eRobert Gabriel Mugabe International Airport ucine ekhululwa sokungenele inhlanganiso ezitshiyeneyo ezibona ngelungelo loluntu.
UAdu-Amankwah ukhangelelwe ukuthi uzakwenza umhlangano lenkokheli yeZimbabwe Congress of Trade Unions, eyakhokhela abantu ukuthi batshengisele emigwaqweni bekhonona ngesimo esibi somnotho welizwe ngoZibandlela.
Amasotsha abulala abantu abedlula itshumi lambili kwathi abanye babotshwa besetheswa amacala okuzama ukususa uhulumende kaMnangagwa esikhundleni okungekho emthethweni.
Kasenelisanga ukukhuluma leziphathamandla zikahulumende ngodaba lolu.