UMongameli Emmerson Mnangagwa usanda kwethula umbiko othi uhulumende wakhe kasoze aguqule imithetho yokhetho athi iqine okwedlula eyakwamanye amazwe.
UMnangagwa, owethule lokhu izolo, ukhulume ngesikhathi eleZimbabwe lilungiselela ukhetho lwama by-elections oluzakwenziwa ngomnyaka ozayo lolukhulu oluzaqhutshwa ngomnyaka ka2023.
Amabandla aphikisayo asezame okwesikhathi eside ukuba kuguqulwe imithetho yokuqhuba ukhetho eZimbabwe kodwa kukhanya engani kuyehlula ngoba uhulumende kazimiselanga ukubumba imithetho ezamenza asuswe embusweni.
UMnu. Joseph Tshuma, okudale leCentral Committee kubandla leZanu PF, uthi kuqondile okukhulunywe nguMnangagwa ngoba akuzwakali kahle okufunwa ngamabandla aphikisayo.
UTshuma uthi kumele amabandla aphikisayo akhulume leZimbabwe Electoral Commission (ZEC) ukuze kulungiswe izikhalazo zabo.
Kodwa uMnu. Mqondisi Moyo, okhokhela ibandla leMthwakazi Republic Party, uthi akwenzakali ukuba kuguqulwe indlela okuqhutshwa ngayo ukhetho eZimbabwe ngoba iZEC iphethwe ngamapholisa ensitha labakubutho.
Owayekhokhela ibandla eliphikisayo eleMovement for Democratic Change, umuyi uMorgen Tsvangirai, wabhubhe ezama ukuguqula indlela yokuqhuba ukhetho eZimbabwe.