Abamele amabandla atshiyeneyo, abakumanyano wePolitical Actors Dialogue (POLAD), baxoxisana eNyanga ngokhetho oluzakwenziwa ngomnyaka ka2023 eZimbabwe kulabakubandla leZanu PF abathi kabasoze bavumele amazwe wonke ukuba ahlolisise indlela okuzaqhutshwa ngayo ukhetho lolu.
Amabandla phose wonke avumelane ukuthi kumele abadabuka kwamanye amazwe bavunyelwe ukuhlolisisa ukhetho lolu.
Kuhlolisiwa emhlanganweni lo umthetho obunjwayo obizwa ngokuthi yiElectoral Amendment Bill eyaphanyekwa ephalamende zinhlanganiso ezimbalwa ezigoqela eyeZimbabwe Electoral Support Network.
Kukhanya engani ibandla leZanu PF lifuna ukuba kukhethwe amazwe adlelana kuphela leleZimbabwe ukuthi abeyiwo wodwa azahlolisise ukhetho oluzaqhutshwa ngomnyaka ka2023.
UMnu. Witness Dube, okubandla leMDC-T, uthi kumele kuvunyelwe abadabuka kwamanye amazwe ukuba bahlolisise ukhetho lolu.
Lokhu kusekelwa nguSenator Khaliphani Pugeni othi kumele ibandla elibusayo livumele ukuba abadabuka emazweni atshiyeneyo behlolisise ukhetho oluzayo
UMnu. Kwanele Hlabangana, umkhokheli webandla leRepublican Party of Zimbabwe osemhlanganweni lo, uthi ibandla leZanu PF liyakusekela ukuthi kube labantu abakwamanye amazwe abazahlolisisa ukhetho elizweni.
Uthi kuqakathekile ukuthi kube labantu abahlolisisa ukhetho.
UMnu. Believe Gayle, okubandla leZanu PF, uthi akumelanga kubizwe abantu abaphikisana lokwenziwa nguhulumende.
EleZimbabwe lijayele ukuzikhethela abantu abadabuka kwamanye amazwe abahlolisisa ukuqhutshwa kokhetho.
Your browser doesn’t support HTML5
Amabandla Ahlaziya Udaba Lokuguqula Indlela Okuqhutshwa Ngayo Ukhetho eZimbabwe