Kulezizalwane zeZimbabwe ezithi uMongameli Emmerson Mnangagwa uzanqoba kukhetho oluzayo njengoba amabandla aphikisayo engani kawakwazi akwenzayo.
Lokhu kwethulwe ngabakhulume kungxoxo mpikiswano lamuhla eWashington DC eMelika yizizalwane zeZimbabwe ezintathu lobanje esinye sikubeke sobala ukuthi uMnangagwa anganqoba ngenxa yemithetho yokhetho engaqedakaliyo.
UNkosazana Wadzanai Mhute wephephandaba leNew York Times, uMnu. Charles Mutuma wenhlanganiso yeZimbabwe Diaspora for Democracy loNkosazana Linda Mujuru.
UNkosazana Linda Mujuru wenhlanganiso yeGlobal Press ebiqoqe umbuthano lo kanye loNkosazana Wadzanai Mhute wephephandaba leNew York Times bathe uMnangagwa kukhanya engani uyakwazi akwenzayo okwamanje ngesikhathi kulungiselelwa ukhetho oluzayo.
UNkosazana Mujuru uthi okuzakwenza uMnangagwa anqobe yikuthi amabandla aphikisayo amaqamuqamu njalo uyakwazi akwenzayo.
“Engikubonayo yikuthi uMnangagwa uzanqoba ngoba amabandla aphikisayo amaqamuqamu. Ngingathi akukhanyi okwenziwa ngamabandla aphikisayo, ikakhulu eleMDC-T lapho okulokulwisana olumangalisayo. Kukhanya engani lokhu kunika uMnangagwa ithuba lokuthi anqobe kukhetho lolu. Ufuna lokuguqula okunengi eZimbabwe.”
Lokhu kusekelwe nguNkosazana Mhute othi uMnangagwa uyakwazi ukukhankasela ukhetho lalabo abamsekelayo kukhanya belamadlabuzani okungena kukhetho.
“Engikubona kusenzakala eZimbabwe emphakathini yikuthi uMnangagwa wenza akwaziyo njalo ibandla leZanu PF seiveze abantu abazangena kukhetho lwama primaries. Sesikwazi ukuthi ngobani abazancintisa kukhetho lolu njalo kukhanya engani bayakwazi abakwenzayo. Kubandla leMDC-T akwaziwa ukuthi ngobani abazancintisa njalo bayalwa okumangalisayo.”
Esinye isizalwane seZimbabwe esikhulume emhlanganweni lo, uMnu. Charles Mutama wenhlanganiso yeZimbabwe Diaspora for Democracy, uthi uMnangagwa uzanqoba kukhetho lolu esebenzisa indlela ezingaqondanga.
“Nxa sikhangela ezemithetho yelizwe leZimbabwe kukhanya engani yenza ukuthi uMnangagwa abelamandla amakhulu okunqoba kukhetho lolu. Amabandla aphikisayo angeke anqobe kukhetho lolu ngoba kusobala ukuthi akukalungiswa okwakufiswa nguhulumende womanyano. Kwakumele kukhangelwe okwenziwa libutho lamapholisa njalo lokuthi kuguqulwe imithetho yokhetho. Konke lokhu akuzange kwenziwe nguMnangagwa.”
Kulabantu abambalwa labo abathi uMnangagwa uzanqoba kukhetho lolu abagoqela uMnu. Paul Kenyon, umlobi njalo oyintathelizindaba yeBritish Broadcasting Corporation.
Abanye bathi kukhanya engani lonyaka kuzakwenziwa ukhetho olubalulekileyo. UMnu. Phithizela Ngcobo, isizalwane zeZimbabwe esihlala eMelika, uthi okuqakathekileyo yindlela okuzakwenziwa ngayo ukhetho lolu.
UNkosazana Nosizwe Moyo, isizalwane seZimbabwe esihlala kwele Melika, uthi kungeke kwenziwa ukhetho olubalulekileyo kwele Zimbabwe.
UNgcobo uphinde wathi okwethusayo yikuthi uhulumende kaMnangagwa ulakho ukwephula amalungelo kazulu engakhethwa ngabantu kukhetho oluzayo. Uthi lokhu kuvezwe yindlela ababambe ngayo abongi abakhalale umsebenzi bekhala ngeholo eliphansi.
Abakhulume kungxoxo mpikiswano le eWashington DC baphinda bakhuluma ngokuhlupha abemba igolide eZimbabwe. Bathi kumele bancediswe nguhulumende ukwenzela ukuphandela impilo imuli zabo.