Sokusungulwe uhlelo lokudinga imali lokunye okuzakwenza isibhedlela esakhiwa ngumuyi uJoshua Mqabuko Nkomo ukuthi sibe yindawo yokulalisa abantu abagula umkhuhlane weCoronavirus COVID-19.
Uhlelo lolu olulesihloko esithi lam4Bulawayo Fighting COVID-19 lwethulelwe uzulu okusemthethweni ngoLwesihlanu.
Osomabhizimusi bakoBulawayo, abamabandla okholo, izikhwicamfundo, abezempilakahle lozulu jikelele, bebethe gwaqa esibhedlela seEkusileni besungula uhlelo lokuzama ukuhlanganisa imali lempahla abazayisebenzisa ukumelana lokumemetheka kwegciwane leCOVID-19 eMaNdebeleni.
UMgcinisihlalo welam4Bulawayo, uMnu Busisa Moyo uthe kuqakatheke kakhulu ukuthi kulungiswe isibhedlela lesi esizanceda abantu abagulayo,ikakhulu ngesikhathi uzulu ebhekane lomkhuhlane weCoronavirus omemetheka okwamagama emhlabeni wonke jikelele.
UMfundisi Useni Sibanda, oyingxenye yale inhlanganiso emele amakholwa, uthi kuyisitshengiselo sokuba abantu bebambene bazanqoba.
EMaNdebeleni akukabi lesibhedlela sokonga abantu abafunyanwa belegciwane leCOVID-19 kumbe ukuhlolwa ukuba balalo loba hatshi. Lokhu sekudale ukuba uBulawayo amanyane azame ukudinga usizo endaweni ezehlukeneyo ukuze bahlomise isibhedlela seEkusileni, iThorngrove Isolation Hospital lezinye.
EleZimbabwe likuviki yesibili yohlelo lweziqondiso zikahulumende zokuthi abantu bahlale ezindlini zabo benganyakazeli indawana yonke ukuze kuvinjwe ukumemetheka lokuthelelanwa komkhuhlane weCOVID-19, osubulele abantu abanengi okumangalisayo emhlabeni wonke jikelele.
Kusenjalo, ugatsha lukahulumende lwezempilakahle selwethule umbiko oveza ukuba undoda owabulawa yiCOVID -19 koBulawayo ngoMqgibelo obhubhele wahlangana labantu abangamatshumi amane lasikhombisa abakhangelelwe ukuhlolwa ukuba abathelelwanga leligciwane.
Lapho abehlala khona eqala ukugula sekuvinjiwe akulamuntu ophumayo longenayo ngaphandle kwabezempilakahle, sebekuquarantine njalo izisebenzi ezilitshumi lantathu zeMater Dei ezazimonga lazo sezivalelwe.
Undoda lo ubikwa ebeleminyaka engamatshumi ayisikhombisa lasifica munwe munye, igama lakhe alikaziswa umphakathi kodwa isidumbu sibikwa sesitshisiwe kulandelwa imithetho yokubeka labobantu ababulawa yiCOVID-19.
Isakhamuzi sakoBulawayo, uNkosazana Linda Sibanda,usola ukuphunyiswa egcekeni kolwazi oluphathelane lale imfa yakuqala kuleli dolobho.
EZimbabwe, lumkhuhlane usuthethe imiphefumulo yabantu besilisa abathathu.