Umnu. Fletcher Dulini Ncube, obeyisiphathamandla sebandla leMDC elikhokhelwa nguMnu. Welshman Ncube kasekho.
Isikhulumeli sebandla leli, uMnu. Nhlanhla Dube, utshele iStudio 7 ukuthi uDulini Ncube okade enguMgcinisihlalo weMDC Council of Elders ubhubhe ngoLwesine emini esibhedlela seMater Dei.
UDube uthe umuyi, owake wetheswa icala lokucatshangelwa ukuthi wabulala owalwa impi yenkululeko, uMun. Cain Nkala, wayengene esibhedlela lesi egula kakubi. Uthi abantu babuthene emzini wakhe eHillside koBulawayo.
UDulini Ncube, owabotshwa lamajaha eMDC aqogela umuyi uRemember Moyo loMnu. Khethani Sibanda walahlekelwa lilihlo esanda kuphuma esitokisini kulandela ukuncitshwa kwakhe amaphilisi okwelapha umkhuhlane wetshukela owe diabetes ngamapholisa.
UDulini, owayekubandla leZAPU ngesikhathi ilizwe lidinga uzibuse eZimbabwe, watshela umphakathi ephuma esitokisini ukuthi watshaywa okumangalisayo labanye bakhe ngamapholisa.
Bonke ababebotshiwe batholakala bengelacala lokubulala uNkala ngomnyaka ka2002. Akesizwe uDube exoxa loGibbs Dube weStudio 7 ngemfa kaDulini.