Abantu abalemisebenzi etshiyeneyo labathenga bethengisa impahla bathi kabasenelisi ukuziphilisa ngenxa yesimo esibi somnotho eZimbabwe lokoma elizweni lonke jikelele.
Abantu abalambayo emadolobheni bedlula izigidi ezimbili - 2,2 million. Abanye ngabasebenza kuhulumende lemafekithali njalo labathenga bethengisa impahla emigwaqweni. Omunye wabaswelayo nguMnu. Matthew Sithole, ohlala eKambuzuma eHarare.
“Nxa ubheka izinto ziyahlupha lapha … Asiphiwa imali eyenelayo. Sikhuluma khonamanje abanye bethu kasikahlawuli imali yezikolo njalo ukudlakuyahlupha. Kasisayazi inyama. Sesiphila ngama chunks. Emasimini akusela lutho ngoba abamakhansili bayageca umumbu wethu emasimini.”
Banengi abathwele nzima njengaye. UMnu. John Benhure, ohlala eWarren Park One eHarare, uthi ubunzima obuselizweni sobusenza ukuba abantu bahambe emisebenzini yabo ukuyadinga ezinye indlela zokuphila hatshi okumele bakwenze emsebenzini lowo.
“Izisebenzi zikahululende kaziyi emsebenzini ukuyasbenza. Bahamba ukuyadinga imali ngezinye indlela zabo ukwenzela ukuthi baphile. Uhulumende kafuni ukubanceda. Bahamba emisebenzini ukuya kwenza okwehlukene lalokho abakuqhatshelweyo.”
UMnu. Kudzai Ruzive uthi impilo inzima kakhulu eZimbabwe.
“Imali zokulima bayatshontsha. Imali kahulumende bathi ngeyabo. Kumele bathole lezimali kodwa kabazoli ngitsho.”
Esinye isakhamuzi seHarare, othe igama lakhe nguFarai, uthi abantu abanengi sebethembele kuNkulunkulu.
“Kufuze sidinge imali amalanga wonke. Akula okulungayo. Wonke umuntu uyakhala. KuloNkulunkulu phezulu ezulwini, siphila ngomusa weNkosi.”
Osakhulayo, uMnu. Lameck Mandevu, uthi abantu kumele bazimisele ukuhambelana lesimo somnotho esibi eZimbabwe.
“Ukuthi izinto zinzima siyavuma kodwa abantu abathengisayo siyacabanga sibone lapho umkhonomi oya khona. Siyacabangela abanye ukuthi ilizwe liyangaphi. Ngikhuthaza abanye ontanga ukuba silwisane lobuyanga sonke.”
Omunye umama osakhulayo, uNkosikazi Faith Murewa, uthi abesifazana abanengi bathwele nzima.
“Udubo lwendlala alutholakali emaphandleni kuphela luyathokala lasemaphandleni. Impuphu isisenza imali engange 100 (Zimbabwe) dollars. Lokhu kwenza omama bethengise imizimba yabo. Emaphandleni abantu bayancedana kodwa emadolobheni kukalutshwana ukuncedana kwabantu. Sithwele nzima njalo sifuna usizo kunhlangangiso ezinceda abantu.”
Omela ugatsha lukahulumende olubona ngabantu abaswelayo olweSocial Welfare, uMnu Clifford Matorera, uthi bahlolisisa inani labantu abaswela ukudla.
“Sesiqalile ukudinga lokubona ukuthi bangaki abantu abadubekayo emadolobheni. Sifuna ukuthi sibone ukuthi labo abasemadolobheni bayanakekelwa.”
Liyakhuphuka inani labantu abaswela ukudla emadolobheni lemaphandleni.
Your browser doesn’t support HTML5
Bathwele Nzima Abantu Emadolobheni Okulabafika 2.2 Million Abalambayo