Abantu abanengi babhekane lendlala emangalisayo emadolobheni okulabanye abadla kanye ngelanga kumbe abacela ukudla nsukuzonke kubomakhelwane lezihlobo.
Uhlangothi lukahulumende olubona ngenswelo zikazulu olweSocial Welfare luthi imuli ezedlula kancane inkulungwane ezingamatshumi amabili lanhlanu – 25,237 eHarare lakoBulawayo kazenelisi ukuziphilisa ngenxa yendlala eyesabekayo eZimbabwe.
Kulokudla okuphiwa abantu okuvela emazweni atshiyeneyo okunikwa ngaphansi kwenhlanganiso yeWorld Food Program.
Umqondisi wohlangothi lolu, uMnu. Clifford Matorera, uthi inengi labantu laba bakoBulawayo. UMatorera uthi umumbu wokusiza abantu abehluleka ukuziphandela ukudla wedlula kancane inkulungwane lamakhulu amabili kusilinganiso sama metric tonnes - 1,261.85 ngenyanga.
Uthi banengi abantu okumele badingelwe ukudla.
Inhlanganiso yeWorld Food Program ithi kulabantu abedlula izigidi ezimbili - 2,2 million abalambayo emadolobheni.
Ugogo uSamusi ohlala eRugare edolobheni leHarare.(VOA: Mavis Gama)
Omunye wababhekane lendlala nguGogo uSamusi, oleminyaka yokuzalwa engamatshumi ayisikhombisa lanhlanu, ohlala eRugare eHarare.
Uthi babephila ngokulima amabele lomkakhe ngesikhathi kusana izulu elinengi.
Banengi ababhekane lendlala njengo gogo uSamusi. UNkosikazi Tsitsi Simon, olabantwana abahlanu, uthi umangoye selala eziko.
Labasebenzela uhulumende abanjengo Mnu. Victor Dube, isakhamuzi Dzivaresekwa, bathi kabasenelisi ukuthola ukudla okufunwa zimuli zabo. UDube uthi impilo inzima kulez’insuku.
UNkosikazi Tsitsi Simon ohlala eRugare eHarare. (VOA: Mavis Gama)
Uthi iholo lakhe liphelela emoyeni ngoba ikhuphuke kakhulu intengo yempahla etshiyeneyo okubangelwa yikugugudeka komnotho eZimbabwe.
Ugcizelele esithi sokwaphela ukudla kathathu ngelanga.
Umfelokazi uSilindile Gatsheni, ohlala emzini omkhulu weMbare ilokitshi elidala kakhulu edolobheni leHarare, uthi baphila nzima.
Inhlanganiso yeWorld Food Program ithi bayahlupheka abantu abanengi emadolobheni lemaphandleni ngenxa yokuswelakala kokudla okubangwa yikungani kwezulu.
UMnu. Neils Balzer, umsekeli womqondisi weWFP eZimbabwe, uthi kukhanya lizakhuphuka inani labantu abangela kudla ngenxa yokungani kwezulu ngemfanelo.
Indlala ikhona lemaphandleni njalo kukhangelelwe ukuba lizathuthuka inani labantu abadinga ukudla lonyaka. (AFP)
UBalzer uthi kaboni kusibalenguquko lonyaka kwezokulima ngakho-ke abantu bazaqhubekala phambili behlupheka.
Lokhu kusekelwa nguNkosikazi Sekai Nzenza, osaphethe isikhundla sohlangothi lukahulumende olwezisebenzi lenhlalakahle kazulu, othi sebeqalile ukunika abalambayo ukudla emadolobheni njengalokhu okwenzakala emaphandleni.
Abanye abantu abathola ukudla ngasebekhulile, intandane labaphila lobugoga. Kukhangelelwe ukuthi lizakhuphuka inani labantu abadinga uncedo kuhulumende lenhlanganiso ezizimele zodwa ngenxa yokungani kwezulu ngemfanelo.
Your browser doesn’t support HTML5
Bayalamba Okumangalisayo Abantu koBulawayo, Harare Lamanye Amadolobho