Amakhulu abantu athe gwaqa ngoLwesihlanu eJohannesburg emkhosini wokukhumbula umuyi uDorothy Masuka, umculi weAfrojazz obelodumo, obhubhe ngoMgqibelo ngeviki ephelileyo.
Izihlobo zika Dorothy Masuka ...
Umculi, umbhali womculo kanye leqhawe lempi yenkululeko. La ngamazwi asetshenziswe yizikhulumi zonke abezisembuthanweni wokukhumbula umuyi eJoburg Theatre.
Bonke bebechaza umuyi njengomunye wabasunguli bomdumo weAfrican Jazz kanye lokusebenzisa lowo mculo ekulweni impi yenkululeko.
Kodwake bebevumelana ngokuthi zazingasweleki ezokubulalisa abantu ngensini kumama uDorothy Masuka.
Usomabhizimusi weJohannesburg, uDun Maphalala, okade esembuthanweni wesikhumbuzo sikamuyi, uthe umculo kaMasuka wawuthakazelelwa ngabantu okumangalisayo.
Benza okwakuthandwa ngumuyi ...
“UDorothy usebenze kakhulu. Uyibambile indima yakhe. And then umotivate intsha, iyouth yethu yonke iyawazi umculo wakhe. Labanye asebehambile ubamothivethile. Hayi at least uphumule.”
Umuyi uzelwe ngo1935 koBulawayo wayakhulela kwele South Africa lapho aqale ukuduma ngedlalade lakhe lakuqala eleminyaka elitshuma lesithuphanje kuphela.
Ezinye zakhe ezadla ubhedu zigoqela uHamba Nontsokolo, uZono Zam, uDr. Malan lo Lumumba.
Imbongi ebezikulo umbuthano zona bezimchaza njengeqhawe.
Bekulabaculu abatshiyeneyoi kulo umbuthano ikakhulu abaqhunsa iJazz yakudala.
Umculo kaDorothy Masuka umenze waba ngumabonabulawe kwele South Africa, kanti lase Zimbabwe umbuso kaIan Smith wayufuna ukumsusela amanqe waze wayaphephela eZambia.
Yena-ke ubhubhe mhlaka 23 ngenyanga ephelileyo ngemva kokugula isikhathi eside ngemva kokuhlaselwa ngumkhuhlane wokoma uhlangothi le hypertension eyaziwa ngabanengi ngokuthi yiBP.
Your browser doesn’t support HTML5
Woza Friday: Uzulu Uvalelisa Umuyi uDorothy Masuka