Abadabuka eZimbabwe abahlala kwamanye amazwe bathi kumele eleZimbabwe libavumele ukuba bavote besemazweni atshiyeneyo kukhetho lwelizwe.
Bathi bakhathazwa ngokwethulwe nguMnu. Patrick Chinamasa, obambe okwesikhatshana uhlangothi olubona ngokukhanga abantu ukuba bangene kubandla leZanu PF, othi abahlala kwamanye amazwe kabasoze bavunyelwe ukuvota besemazweni atshiyeneyo nxa kungesulwanga izijeziso zenotho ezafakelwa inkokheli yebandla leZanu PF ngamazwe entshonalanga.
UNkosikazi Barbara Tanyanyiwa, okubandla leMDC Alliance, uthi kumele bavunyelwe kuvota abadabuka eZimbabwe abahlala kwamanye amazwe.
Lokhu kusekelwa nguMnu. Mthulisi Hanana, okunhlanganiso yeDumiso Dabengwa Foundation, osanda kubaleka eZimbabwe kulandela ukuhlaselwa kwakhe ngabacatshangelwa ukuba badlelana lohulumende kaMongameli Emmerson Mnangagwa.
Kodwa uMnu. Joseph Tshuma, okubandla leZanu PF, uthi kunzima kakhulu ukuqhuba uhlelo lweZimbabwe kwamanye amazwe, ikakhulu afakela inkokheli yebandla leZanu PF izijeziso zenotho.
Abadabuka eZimbabwe abahlala kwamanye amazwe sebelesikhathi eside becela uhulumende ukuba avumeke ukuthi bavote kukhetho lwelizwe.
Your browser doesn’t support HTML5
Abadabuka eZimbabwe Abahlala Kwamanye Amazwe Bafuna Ukuvota Kukhetho