Intathelizindaba uHopewell Chin’ono, owaziwa ngokuloba indaba eziveza ubukhohlakali njalo lokubotshwa eZimbabwe, usethakazelelwa ngabantu abanengi emhlabeni wonke jikelele kulandela ukwethula kwakhe ingoma ethi ‘DemLoot’, echothoza ubukhohlakali kuhulumende.
UChin’ono uthi ingoma le, ayethule enkundleni yokuxhumana eyeTwitter kunsukwana ezisanda kwedlula, uyifake enkundleni yokuxhumana ngesikhathi ebala ingwalo ezitshiyeneyo endlini yakhe.
Uthi wenze lokhu kulandela ukubotshwa kwakhe njalo lokuchothoza abatsha athi abafisi ukungena kwezombusazwe eZimbabwe.
Uthi ingoma le kayehlisi izinga lakhe lokuloba indaba kumaphephandaba anjenge New York Post leThe Guardian.
“Akungilulazi lokhu ngoba ngithe ngikwethula bengingalobi indaba. Ngikwenze njengomuntu nje owakwele Zimbabwe. Ngakwenza sengingani kangisayenelisi ukubala ingwalo zami. Ngithe ngikwethula ngakhumbula engangikutshela abatsha ikakhulu okokuthi kabalandeli ezombusazwe njalo lalokhu engangikucabanga ngisentilonngweni. Kungimangalise kakhulu sengibona abantu beyithakazelela ingoma le. Banengi abantu asebesenza ezabo ezifana lale bechothoza okwenziwa nguhulumende emazweni abo.”
Uthi uVusa Mkhaya utshaye ingoma efana leyakhe ekuzinga eliphezulu ngakho-e usemcele ukuba alobe ingoma epheleleyo. Ugcizelele esithi lotshaya ikatali odabuka kwele Nigeria, uHelen Ebe, owaziwa kakhulu, laye okwamanje uphekapheka ingoma efanayo.
Ingoma kaChin’ono isitshaywa ngabantu abasemazweni atshiyeneyo abayithumeza enkundleni yokuxhumana eyeTwitter.
Uthi akwenzileyo akusoze kumxabanise leziphathamandla zelizwe leZimbabwe.
Usebothwe kanenginengi esetshezwa amacala anjengokutshotshozela udlakela, ukuloba amanga lokunye.
Uthi kungamanga konke lokhu okwenziwa nguhulumende.
Your browser doesn’t support HTML5
Intathelizindaba uHopewell Chin'ono Uxoxa Lomsakazo weVOA Studio 7